"ბადანტის", ძიძის, მოახლის კუთვნილი შვებულება და პირობები

ამ სტატიაში ვისაუბრებთ ოჯახებში დასაქმებული პირების (მომვლელი, ძიძა, მოახლე) კუთვნილ შვებულებაზე.

პირველ რიგში გეტყვით, რომ შემდგომში გაუგებრობის თავიდან ასაცილებლად, უმჯობესია, შვებულების პერიოდი სამუშაო კონტრაქტის გაფორმებისას პირობებში ჩაიწეროს, მაგრამ თუ კონტაქტის რეგისტრაციისას ეს პუნქტი არ გაგითვალისწინებიათ, საგანგაშო არაფერია, ცვლილებების შეტანა ნებისმიერ დროს შეიძლება.

წელიწადში რამდენი დღე შვებულება ეკუთვნის ოჯახში დასაქმებულ პირს?

წლიური შვებულება შეადგენს 26 დღეს, იმის მიუხედავად პირი  საათობრივად არის დასაქმებული, თუ გახანგრძლივებული გრაფიკით და იმავე ოჯახში ცხოვრობს, სადაც მუშაობს. იმ შემთხვევაში თუ შვებულების აღება ერთი წლის შესრულებამდე გსურთ, კუთვნილი დღეები ნამუშევარი თვეების მიხედვით უნდა გამოთვალოთ, რაც დღეში 2,16 დღე გამოდის. დამსაქმებელს, ურთიერთშეთანხმების საფუძველზე, შეუძლია შვებულების დღეები წინასწარ მოგცეთ. ასევე შეთანხმების საფუძველზე, თქვენი საჭიროების შემთხვევაში, შეგიძლიათ მოითხოვოთ უხელფასო საშვებულებო პერიოდი.

შვებულების გამოყენების ფორმა

შვებულება დასაქმებული პირის მიერ გამოყენებული უნდა იყოს უწყვეტი ფორმით, მაქსიმუმ ორ ჯერზე, აქედან ორი კვირა ივნისი-სექტემბრის პერიოდში. თუმცა, უცხოელებისთვის არსებობს გამონაკლისი, მათ შეუძლიათ ორი წლის განმავლობაში დააგროვონ შვებულება და შემდეგ საკუთარ ქვეყანაში წასასვლელად გამოიყენონ.

რა შემთხვევაში შეიძლება შეწყდეს შვებულება?

შვებულება ავტომატურად შეწყდება, თუ პირს ჯანმრთელობასთან დაკავშირებული პრობლემები შეექმნება, საჭირო გახდება მისი საავადმყოფოში გადაყვანა და ამ ყველაფერს ექიმის ცნობით დაადასტურებს.

სხვა არავითარ შემთხვევაში არ უნდა შეწყდეს შვებულების პერიოდი, მეტიც აღნიშნული პერიოდის განმავლობაში ჩვეულებრივ გროვდება და იგულისხმება მეცამეტე ხელფასი, სამუშაო სტაჟი და TFR (ანაზღაურება კონტრაქტის შეწყვეტის შემდეგ).

ანაზღაურება

შვებულების ანაზღაურება, ამ უკანასკნელის გამოყენების შემდეგ, მიმდინარე თვის ბოლოს ხდება.

შემცვლელი

იმ შემთხვევაში, თუ შვებულების პერიოდში ოჯახს სჭირდება შემცვლელის მოძებნა, უფლება აქვს მოძებნოს ის და გაუფორმოს დროებითი სამუშაო ხელშეკრულება.

თანხლება

ოჯახში დასაქმებული პირი ვალდებულია გაჰყვეს დამსაქმებელს დროებითი გადაადგილებისას დასვენების მიზნით, იქნება ეს საზაფხულო აგარაკი თუ სხვა. ამ შემთხვევაში ნარჩუნდება კონტრაქტით განსაზღვრული ანაზღაურება. იმ შემთხვევაში თუ პირი საათობრივად არის დასაქმებული, შეთანხმება შესაძლებელია და ამ შემთხვევაში ანაზღაურებაშიც ცვლილება იქნება.

შესაძლებელია თუ არა შვებულების მონეტიზაცია?

კანონის მიხედვით შვებულების არ გამოყენება და ამ პერიოდის ანაზღაურება ფულის სახით არ შეიძლება, რადგან შვებულების გამოყენება დასაქმებული პირის უფლება და ვალდებულებაა. არსებობს ერთადერთი გამონაკლისი, როდესაც სამუშაო ხელშეკრულება ვადაზე ადრე წყდება და შვებულება გამოუყენებელი რჩება.

ასევე დაგაინტერესებთ:

🔵 „ბადანტეს საქმე“ - შესაძლოა მოხუცის შვილის პასუხისმგებლობის საკითხი დადგეს?!

🔵 „ბადანტემ“ იმ მოხუცზე “იქორწინა”, რომელსაც უვლიდა და ქონება უკანონოდ მიითვისა

🔵 იტალიური ენის უფასო კურსები ემიგრანტებისთვის - ქალაქების მიხედვით