მეცამეტე ხელფასი “ბადანტეებისთვის და კოლფებისთვის” - რა უნდა იცოდეთ!

იტალიაში დასაქმებული "ბადანტეებისთვის", ძიძებისა და "კოლფებისთვის", დეკემბერი, წლის ყველაზე "მდიდარი" თვეა. დამსაქმებელი ოჯახი სწორედ წლის ბოლო თვეს უხდის დასაქმებულს მეცამეტე ხელფასს. ფაქტობრივად, ოჯახში დასაქმებული პირები, სხვა სექტორში დასაქმებულთა მსგავსად, ორმაგ ხელფასს იღებენ. მათ მეცამეტე ხელფასი ეკუთვნით მიუხედავად იმისა, რა ტიპის სამუშაო კონტრაქტი აქვთ გაფორმებული, იქნება ეს სრულ, თუ ნახევარ განაკვეთზე, საათობრივად, თუ 24/24. 

მეცამეტე ხელფასი მთელი წლის განმავლობაში გროვდება და იმის მიხედვით ხდება გადახდა, თუ როდის გაფორმდა სამუშაო ხელშეკრულება. თუ სრულად ერთი წელი იმუშავეთ, თქვენი მეცამეტე ხელფასი, თვიური ანაზღაურების თანაბარი იქნება. 

თუ მაგალითად, მარტში მოხდა სამუშაო კონტრაქტის გაფორმება, დასაქმებულს მეცამეტე ხელფასის სახით, უფლება აქვს მიიღოს 10 თვის განმავლობაში დაგროვებული პროცენტის შესაბამისი თანხა. ანუ, თვიური ხელფასი იყოფა 12-ზე და შემდეგ მრავლდება 10-ზე (ნამუშევარი თვეების რაოდენობაზე).

მეორენაირად მეცამეტე ხელფასს საშობაო ბონუსსაც უწოდებენ, იქიდან გამომდინარე, რომ შობის თარიღთან ახლოს ხდება გადახდა.

ნინა მამუკაძე