უსახლკაროებს პირადი ექიმის აყვანის უფლება ექნებათ - იტალიის უკვე მეორე რეგიონმა მიიღო აღნიშნული კანონი

იტალიაში სამედიცინო მომსახურება ყველასთვის ხელმისაწვდომია, არ აქვს მნიშვნელობა, პირი არის თუ არა იტალიის მოქალაქე, "ლეგალია", თუ არალეგალი, მაგრამ არის ბიუროკრატიული ფაქტორები, რომლებიც ზოგიერთ შემთხვევაში, გარკვეულ წინაღობებს ქმნიან.

ამჯერად, საუბარია პირადი, ანუ საბაზისო ექიმის ინსტიტუტზე, რომელზე წვდომაც, მხოლოდ იტალიაში ოფიციალურად ჩაწერის მქონე პირებს აქვთ და რომლის გარეშეც შეუძლებელია გარკვეული სამედიცინო მომსახურებების მიღება. 

სწორედ ამიტომ, გასული წლის ბოლოს, ემილია-რომანიას რეგიონმა, ხოლო ახლა უკვე პიემონტეს რეგიონმა, მიიღო კანონი, რომელიც უსახლკარო ადამიანებს, რომლებსაც თავისთავად ჩაწერა არ აქვთ, უფლებას აძლევს აიყვანონ პირადი ექიმი, რათა ყველა პრობლემის გამო სასწრაფო დახმარების გამოძახება არ მოუწიოთ და შეძლონ სრულყოფილი სამედიცინო მომსახურების მიღება. 

კანონის წარდგენის პროცესზე ითქვა, რომ - "ქუჩაში ცხოვრება ადრე შეიძლება ცხოვრების სტილი და ადამიანის არჩევანი იყო, მაგრამ ახლა უამრავი ადამიანია, რომელიც გაჭირვების გამო დარჩა ღია ცისქვეშ, სამედიცინო მომსახურების მიღება კი ადამიანის ფუნდამენტური უფლებაა. თანაც პანდემიამ გვასწავლა, რომ მკურნალობა ეს კოლექტიური უფლებაა, რათა გარანტირებულ იყოს, თითოეული ადამიანის ჯანმრთელობა."