„აქაც კარგი საბუთიანი გიჟები ცხოვრობენ, ჩვენი არ იყოს“ - ემიგრანტი ჟურნალისტი აშშ-დან

ამერიკის შეერთებულ შტატებში მცხოვრები, ქართველი ჟურნალისტი შორენა გოგოლაძე, საქართველოდან ნიუ იორკში ჩასულ, სამუშაოს მაძიებელ მეგობარზე ისტორიას იხსენებს.

„წიგნის დაწერა რომ შემეძლოს, აუცილებლად დავწერდი ამერიკაში მყოფ ქართველ ქეარგივერებზე. მათ ისტორიებს, რომელიც ზოგჯერ ისეთი სასაცილოა და ზოგჯერ ძალიან სევდიანი. რადგან მე სევდებზე არ მიყვარს გაჩერება, ერთ სასაცილო ისტორიას მოგიყვებით.

ძველი ამბავია, გასული წლის. მოკლედ ჩემი მეგობარი ეძებს სამსახურს ბებოსთან, ან ბაბუსთან.

აქაც ჩვენ ჩვენი მოთხოვნები გვაქვს როცა სამსახურს ვეძებთ. ზოგს უნდა მოსიარულე (ასე ვეძახით შემოკლებით), უნდა ცხოვრობდეს მარტო. (ეს იმას ნიშნავს, რომ სასურველია მისი შვილები ცხოვრობდნენ შორს, კიდევ უფრო სასურველი - შტატს გარეთ). ჰქონდეს ეზოიანი სახლი და ა.შ. ზოგს პირიქით ურჩევნია, მწოლიარე, ღამის 3 საათზე რომ არ გაიპაროს გარეთ.

მოთხოვნები აქვთ დამქირავებლებსაც. მაგალითად ზოგს უნდა მართვის მოწმობით და მანქანით იყოს ქეარგივერი, გამხდარი, ასაკი 30-50 წელი.

სხვათა შორის, დამეთანხმებიან აქაურები, ძალიან უნდათ იყოს ქართველი (ამ თემას ვიკვლევ ჯერ, არ ვიცი მიზეზი. დაახლოებით კი ვხვდები რატომ).

ჩემი მეგობრის ამბავს რომ დავუბრუნდე, ეძებს სამსახურს. ვზივართ გარეთ გოგოები, სამუშაო დღის ბოლოა, ვსვამთ ყავას, ვყვებით საღლიცინო ამბებს და რეკავს ტელეფონი.

გავჩუმდით ყველა, ველოდებით რას ეტყვიან. დაიწყო დამსაქმებელმა ჩამოთვლა.

ესეიგიო ოჯახი ეძებს-ო: საშუალო ასაკის, ენერგიულ ადამიანს, მართვის მოწმობით, კარგი ინგლისურით, სამუშაოს გამოცდილებით, სარეკომენდაციო წერილებით. ხელფასიც დიდებული.

ეს ჩემი მეგობარი აკმაყოფილებდა ყველა მოთხოვნას და მოკლედ, ეგა ვარო, რასაც ეძებთ, როდის მოვიდეო. იმ ქალმა, ტელეფონის მეორე მხარეს, მოიცაო და კიდევ, ზოდიაქოთი თხის რქასო,

- ჰოდა თხის რქა ხარო?

- არა, ლომიო - ამან და დარჩა სამსახურის გარეშე.

აქაც კარგი საბუთიანი გიჟები ცხოვრობენ, ჩვენი არ იყოს“, - წერს ფეისბუკში აშშ-ში მცხოვრები ჟურნალისტი, შორენა გოგოლაძე.

ასევე საინტერესოა:

🔵 „მინდა, იმ უცნაურმა გოგომ მკითხოს, მეც ომახიანად ვუპასუხებ #დემნაგვასალიას სამშობლოდან ვარ“ - ემიგრანტის წერილი

🔵 ემიგრანტი ჟურნალისტი - „ისევ მაქ ვიქნებოდი, ოთხას ლარიან ხელფასს მიჩიჩინებული და მშვიდად დავიხოცებოდით შიმშილით“