ეს ქმნის სასამართლოს დამოუკიდებლობისა და მისდამი ნდობისთვის ძირის გამოთხრის საფრთხეს - ევროკავშირი მოსამართლეთა დანიშვნაზე

ევროკავშირი კიდევ ერთხელ მოუწოდებს საქართველოს მთავრობას გააძლიეროს სასამართლო სისტემის დამოუკიდებლობა, ანგარიშვალდებულება და ხარისხი, მათ შორის იუსტიციის უმაღლესი საბჭოსი, ფართო, ინკლუზიური და პარტიებს შორისი რეფორმის პროცესით.

„ოთხშაბათს საქართველოს პარლამენტმა უვადოდ დანიშნა უზენაესი სასამართლოს ოთხი მოსამართლე. ამგვარი დანიშვნები, რომლებიც ხორციელდება მანამ, სანამ ყურადღება მიექცევა ნომინაციის პროცესში არსებულ ხარვეზებს, არ პასუხობს ეუთო/ოდირის და ევროპის საბჭოს ვენეციის კომისიის რეკომენდაციებს.

ეს ბოლო დანიშვნები წინააღმდეგობაში მოდის საქართველოს ლიდერების მიერ წელს, 19 აპრილის შეთანხმებით დადებულ და 28 ივლისს გამეორებულ პირობასთან ამბიციური სასამართლოს რეფორმის გატარების შესახებ. ეს მოიცავდა უზენაეს სასამართლოში ნომინირების პროცესზე მუშაობას, მანამ, სანამ მოსამართლეები დაინიშნებოდნენ.

ეს ნაბიჯები ქმნის სასამართლოს დამოუკიდებლობისთვის და საქართველოს სასამართლო სისტემის მიმართ საზოგადოების ნდობისთვის ძირის კიდევ უფრო მეტად გამოთხრის საფრთხეს“, - ნათქვამია ევროკავშირის საგარეო სამსახურის საგანგებო განცხადებაში.

მანამდე, უზენაესი სასამართლოს მოსამართლეთა შერჩევის პროცესი გააკრიტიკა შეერთებული შტატების საელჩომ. მათი განცხადებით, ეს პროცესი არ შეესაბამებოდა 19 აპრილის შეთანხმებით აღებულ ვალდებულებებს.

1 დეკემბერს, საქართველოს პარლამენტმა კენჭი უყარა და საქართველოს უზენაესი სასამართლოს წევრებად აირჩია მოსამართლეები: გენადი მაკარიძე, ნინო სანდოძე, თამარ ოქროპირიძე, თეა ზიმისტარაშვილი.

ასევე საინტერესოა:

🔵 ხარჯების დიდი ნაწილი არის სანდრასი, სიამოვნებით ვიჯდებოდი მასთან ერთად ერთ საბრალდებო სკამზე - მიხეილ სააკაშვილი

🔵 ემიგრანტის წერილი: “ჩამოვჯდები ცივ ქვაზე და ახლოდან მოგიყვები დე, დამელოდე“