ვხედავ კავკასიონზე მეომრებს, მესმის ხმლების ჟღარუნი, რომელიც ქართველთა გამარჯვებას გვამცნობს - ლელა კაკულია

ლელა კაკულია, რომელიც თავს ქართველ წინასწარმეტყველს უწოდებს, თავის ოფიციალურ გვერდზე ახალ წინასწარმეტყველებას აქვეყნებს, როგორც ირწმუნება, ამ შესაძლო მოვლენების შესახებ ჩანაწერები 2020-2021 წლებში გააკეთა.

"ახალი სიტყვა: ნამდვილი გიორგი ბრწყინვალე ჩემ წინ იქნება ძალიან მალე!

2020 წელი, 13 ივლისი

თურქები ყოველთვის ცდილობდნენ, ისევ მეჩეთად გადაექციათ აია სოფია – ბიზანტიური მართლმადიდებლური ტაძარი. მაგრამ მათი მცდელობები არასდროს არ მთავრდებოდა სიკეთით. და ვხედავ, ახლაც ასე მოხდება.
წმიდა სოფიას ტაძრის მეჩეთად გადაქცევა არცერთ შემთხვევაში არ შეიძლება, იმიტომ რომ იქ ქრისტიანული ჯვარი დევს და ის ენერგეტიკა ტრიალებს, რომელიც პირდაპირ კოსმოსიდან მოდის. ამიტომ ეს ნაბიჯი — აია სოფიას ისევ მეჩეთად გადაქცევა, ძალიან ძვირი დაუჯდება თურქეთს.
საბოლოო ჯამში კი, ვხედავ, წმიდა სოფიას ტაძარი ისევ მუზეუმად გარდაიქმნება. ასეთია წინასწარმეტყველება და მას ვერაფერი შეცვლის!

2021 წელი, 9 თებერვალი
მსოფლიო პოლიტიკა უფრო და უფრო დაიძაბება. ათობით წლის წინ მაქვს ნაწინასწარმეტყველები, რა მოხდებოდა მსოფლიოში და ეს პერიოდიც დადგა. რუსეთის აქტიურობა ნელ–ნელა კარგავს ძალას გლობალურ პოლიტიკაში, იმიტომ რომ მთელი მსოფლიო უპირისპირდება პუტინს. ამერიკა უკან დახევას არ აპირებს, პირიქით, თუ დასჭირდა, ომსაც კი მოუწყობს რუსეთს. ანუ, თუ დასჭირდა, დაარტყამს და ატომურ ბომბსაც კი აუფეთქებს. დიახ, ყველაფერი აქამდეა მისული.
რაც შეეხება რუსულ პოლიტიკას კავკასიაში, მის ბოლომდე გატარებას პუტინი ვერ შეძლებს. საქართველო დააჩოქოს და ისეთი დარტყმა, ზიანი მიაყენოს, რომ გაგვაქროს — ეს გამორიცხულია. რუსი უფრო გაქრება, ვიდრე ქართველი. ამინ!

რაც შეეხება აზერბაიჯანისა და სომხეთის მორიგებას — არც იფიქროთ, ყარაბაღს თემა დახურული არ არის. ქალაქი შუშა, რომელიც სომხეთს ეკუთვნოდა, რუსეთმა უტიფრად ჩამოართვა და გადასცა აზერბაიჯანს. ეს არის ძალადობა. რუსეთმა ფაქტობრივად მოტყუებული დატოვა სომხეთი. ამიტომ ერევანს თავისი გეგმა აქვს მომავალში და ისეთ დროს დაარტყამს და ატეხს ერთ ამბავს, როცა ყველა ფიქრობს, რომ არაფერი არ იქნება. არადა, სწორედ მაშინ იქნება ყველაფერი. ანუ იმის თქმა მინდა, რომ ყარაბაღის ომი არ დამთავრებულა.
თურქეთს თავისი პრობლემები აქვს — ძალიან გაუჭირდება. ნატო სილას გააწნავს თურქეთს და მთელ თურქულ პოლიტიკას ყირაზე დააყენებს.
რაც შეეხება ირანს, ის თავშიც თამაშობდა, ახლაც თამაშობს და მომავალშიც ითამაშებს. ირანი ბირთვული იარაღის წარმოებას განაგრძობს და ამის შეწყვეტა შეუძლია მხოლოდ ამერიკას, რომელიც ჰუმანური პოლიტიკის გატარებას სულაც არ ფიქრობს — პირდაპირ დაარტყამს ირანს. ეს წარსულში მაქვს ნაწინასწარმეტყველები და ახლაც იგივეს ვხედავ. ამაში ჩაერთვება ისრაელიც ( ესეც ნაწინასწარმეტყველები მაქვს) და ეს ყოველივე დამთავრდება ამერიკული პოლიტიკის გამარჯვებით.

ვხედავ, როგორ ნადგურდება ირანის „ბირთვული პროგრამა“, მთლიანად წაიშლება. ვხედავ, ირანი ურთულეს პოლიტიკურ მდგომარეობაში ჩავარდება, ამერიკა კი გამარჯვების დროშას აფრიალებს.
სხვათა შორის, ვხედავ, ამერიკის ახალი პრეზიდენტი დაუბრუნდება ირანის ბირთვულ შეთანხმებას და ეს საჭიროცაა. ვაშინგტონსა და თეირანს შორის იმდენად მძიმე საუბრები იქნება, რომ ირანი შეთანხმებაში დაბრუნების პირობებზე ლაპარაკს ვერც გაბედავს. „ჯერ შენ დაბრუნდი შეთანხმებაში და მე მერე შევწყვეტ ბირთვულ პროგრამას“ — ეს წავიდა, წარსულში დარჩა.

ამერიკის პრეზიდენტი მოქმდებს უხეშად, მაგრამ ასეა საჭირო!
საქართველოს აუსრულდება ყველაფერი, რაც ნათქვამი მაქვს — ნატოში შესვლა იქნება ეს თუ სხვა დიდი ცვლილებები. იქნება ბევრი ცვლილება სიკეთისკენ. მოდის „გიორგი ბრწყინვალე“, მოდიან „მეცნიერები“.
ამწუთას ვხედავ: ირანი აუცილებლად დაარტყამს აზებაიჯანს (ისე ირანს ნუ ჰგონია, რომ რუსეთი მისი დიდი მეგობარია. მაგალითი ცხვირწინ აქვს — სომხეთის სახით) და აზერბაიჯანი რას მიაღწევს? — ვერაფერს! ამიტომ ბაქოს ყველა ქმედება აბსოლუტურად ფუჭია.
აბრეშუმის გზა იყო და არის საქართველო და ამას გვერდს ვერავინ აუვლის. ეს არის გზა, რომელიც ირანისთვისაც მისაღებია, სომხეთისთვისაც და აზებაიჯანი ამ ბრძოლას წააგებს. თან წინ კიდევ ყარაბაღის ომი ელის.
წყევლა ადევს აზერბაიჯანს – დავითგარეჯას წყევლა! ამ წყევლას ვერც აზერბაიჯანი გაექცევა, ვერც თურქეთი და ვერც რუსეთი და ვერც ვერავინ.

მე საქართველოს კავკასიის მარგალიტი დავარქვი და იცოდეთ, რომ საქართველო მართლაც მარგალიტია. კი უნდათ სომხეთსაც და აზერბაიჯანსაც მისი ადგილის დაკავება გეოპოლიტიკური კუთხით, მაგრამ არაფერი გამოუვათ. ან რანაირად? შავი ზღვა სომხეთისა კი არ არის, საქართველოსია. სომხებს კი აფხაზეთიდან რომ გამოყრიან – მაგასაც მოვესწრებით.
ვხედავ, იქ აფხაზები ხომ აღარ ცხოვრობენ, მაგრამ უკვე აფსუებიც აღარ არიან. თანაც უკვე ძალიან ბევრი იხრება საქართველოსკენ.

წყალდიდობებს ვხედავ აფხაზეთში — პირდაპირ ვუყურებ, როგორაა ყველაფერი ამოყირავებული.
მაგრამ მალე ყველაფერი თანდათანობით დაეწყობა და დალაგდება. ქართულ პოლიტიკას დიდი მხარდაჭერა აქვს ამერიკისა და ევროპისგან და ჩვენი ქვეყნის დაცემა — ეს გამორიცხულია!
 მინდა აღვნიშნო, რომ წიგნი, რომელსაც ახლა ვამზადებ გამოსაცემად – ქართველი წინასწარმეტყველის, ლელა კაკულიას ლოცვები და მიმართვები — ეს არის ენერგია, რომელსაც ახლა ერთად ვკრებ, ვაერთიანებ და ეს ისეთი კოლოსალური ძალაა, რომელსაც რუსეთი კი არა, მსოფლიო ვერ გაუძლებს.
აი ამიტომაც არ უნდა ეშინოდეს ჩემს ხალხს.
ნუ გეშინიათ! ყველაფერი ჩაივლის ცუდი ზღპარივით და საქართველო მყარად დადგება ფეხზე. ჩვენი ქვეყანა ისეთ ადგილს დაიკავებს, როგორიც არასდროს დაუკავებია მთელი თავისი არსებობის განმავლობაში.
და ისევ ვხედავ კავკასიონზე მეომრებს, მესმის ხმლების ჟღარუნი, რომელიც ქართველთა გამარჯვებას გვამცნობს.
და კავკასია — ეს არის საქართველო!

18 აპრილი, 2021 წელი
არ მინდა არაფრის დანახვა, იმდენად დაძაბულია დედამიწა, მთელი პლანეტა და არა მარტო საქართველო. საქართველო ყველაზე მსუბუქად გამოძვრება ამ ქაოტური პოლიტიკური, არეული და დაქცეული პერიოდიდან.
საქართველოს, როგორც ყოველთვის ვამბობდი, დიდი ძალა იცავს და დაიცავს ბოლომდე. ყველაფერი გადალაგდება ისე, როგორც მე, ქართველმა წინასწარმეტყველმა ლელა კაკულიამ ვიწინასწარმეტყველე. ვერავინ ვერაფერს ვერ შეცვლით! ვერ შეცვლით! ვერ შეცვლით! ამიტომ იმისთვის, რაც მოდის, ანგარიში მაინც გაუწიეთ და წაიკითხეთ ჩემი წინასწარმეტყველებები, რომლებიც მსოფლიო გლობალურ პოლიტიკას მოიცავს.
საქართველო გადარჩება, სხვა ქვეყნებისა კი, რა გითხრათ, ძალიან გაუჭირდებათ ისეთ წამყვან ქვეყნებსაც კი, როგორებიცაა ევროპის ქვეყნები, ამერიკა და ა.შ.
რუსეთმა ძალიან რთული თამაში წამოიწყო. რუსეთის პოლიტიკა ფაქტობრივად განწირული ევროპაშიც, ამერიკაშიც და ახლო აღმოსავლეთშიც. თითქოს დიდ პოლიტიკას ატარებს ახლო აღმოსავლეთის ხაზით, მაგრამ დიდ პოლიტიკას კი არა, წამგებიან პოლიტიკას ატარებს. იმიტომ რომ თურქეთი რუსეთს არ მიჰყვება — მიჰყვება იქამდე, სადამდეც თავად თურქეთის პოლიტიკას სჭირდება. იმაში, რასაც რუსეთი აკეთებს, თუ მას ფეხი დაუცდა, თურქეთი ომს გამოუცხადებს — ეს ასეა. და პირველი დარტყნები იქნება შავ ზღვასთან დაკავშირებით. მე ეს ადრეც ვიწინასწარმეტყველე — შავი ზღვის ომი დავარქვი. საქართველო კი მაყურებლის როლში იქნება.
საქართველოში პოლიტიკური პარტიები იცვლებიან. წარსულიდან წამოსულ პარტიებს ფაქტობრივად არ აქვთ მყარი ბაზა და ვერც ექნებათ, იმიტომ, რომ იქ არ დგანან ის ახალგაზრდები — ჩემი პატარა ქართველები, რომლებიც მე ვიწინასწარმეტყველე და გზა გავუხსენი.

მათ ხელის შემშლელებს კოსმოსი ისე გაგწევთ გვერდზე, რომ ვერასდროს ვერ მოხვალთ პოლიტიკაში. მთელი კოსმოსი ამ ახალგაზრდებისკენაა მომართული. ეს არ არის შეკვეთა. ისინი მოდიან თავისი ნებით და ისინი მოჰყავს კოსმოსს და ეს არის ნამდვილი ძალა. და გიორგი ბრწყინვალე.
უნდა აღვნიშნო: ნახევარ საქართველოს გიორგი ჰქვია და ეს იმას არ ნიშნავს, რომ მათგან რომელიმეა გიორგი ბრწყინვალე. ნამდვილი გიორგი ბრწყინვალე ჩემ წინ იქნება ძალიან მალე, იგი მიიღებს დალოცვას, დიდ ენერგიას კოსმოსიდან და ჩაეფლობა, ასე ვთქვათ, შეცურავს ქართულ პოლიტიკაში. მე ეს ძალიან მიხარია.
და კიდევ: ვის რა ელის და როგორ დაამთავრებს, ძალიან კარგად ვიცი, მაგრამ ამას არ გავახმოვანებ. მე ნაწინასწარმეტყველები მაქვს მნიშვნელოვანი პოლიტიკური საკითხები, რაც საქართველოს ეხება — და ელოდეთ მათ ასრულებას!

შადიმანებო, გაფრთხილებთ: ფეხსაც ნუ გააფაფხურებთ. სჯობს ჩაიკეტოთ თქვენთვის და თვალყური ადევნოთ ახალი საქართველოს შენებას, საქართველოს მიღწევებს. საქართველო ერთ–ერთი წამყვანი ქვეყანა იქნება–მეთქი, ბევრჯერ აღვნიშნე და კავკასიის მარგალიტიც ვუწოდე.
საქართველოში ოლიგარქები ვერასდროს ვერ მოვლენ — ვერასდროს და არასდროს! საქართველო იქნება ცენტრი ნამდვილი პოლიტიკისა, რომელსაც პატივს სცემენ მთელი ევროპა და ამერიკა.

ეს ასე იქნება, ჩემო საყვარელო ქართველებო. ნუ შეშინდებით!
მე 1990–იან წლებში მაქვს ნაწინასწარმეტყველები, ბუნებას ნუ მოეპყრობით უდიერად, თორემ მისი უდიდებულეობა ბუნება არ გაპატიებთ–მეთქი. ამიტომ ნაპრალი, რომელიც არის გაჩენილი ვაშლიჯვრის ფერდობზე, ძალიან საშიშია. მე ამას ვერ შევაჩერებ. შეიძლება შევაჩერო, იმიტომ რომ დაცვითი ენერგეტიკა არის, მაგრამ კოსმოსიდან ის ჯერ არ წამოსულა. ბეტონით და ფილებით ვითომ გამაგრებული კლდე — ეს კლდე აღარ არის უკვე, ვინაიდან ისევ განიცდის, ასე ვთქვათ „მუტაციას“, ცვლილებას. ის ისევ წამოვა, მაგრამ რომ ვთქვა, რომ ამას დიდი სიკვდილიანობა მოჰყვება — ასე არ იქნება, მაგრამ... მოკლედ, არ მსიამოვნებს, რასაც ვხედავ. ფრთხილად! ფრთხილად! ფრთხილად!

ქართული პოლიტიკის ცვლილება ძალიან მნიშვნელოვანია ჩვენი ხალხისთვის. უკრაინასთან ურთიერთობები უფრო გამყარდება. ნუ გიხარიათ, შადიმანებო — უფრო გამყარდება! უკრაინა დიდ დახმარებას გაუწევს საქართველოს. დღევანდელი მოვლენები, რაც უკრაინა–რუსეთს შორის დატრიალდა და რაც პუტინმა დაატრიალა, საქართველოს ცეცხლზე წყალს ასხამს და ბევრ რთულ მომენტს აქრობს, რათა საქართველო მართლა არ განადგურდეს. უკრაინის პოლიტიკა იცავს საქართველოსა და ქართველებს და დაიცავს ბოლომდე.
ნურაფრის იმედი ნუ გექნებათ, შადიმანებო! საქართველო არ არის უბრალოს საკურორტო, დასასვენებელი ზონა. გაიგეთ, ბოლოს და ბოლოს: საქართველო არის უფლის სამოთხე და უფალი ნებას არ მოგცემთ, რომ ეს სამოთხე თქვენ გაანადგუროთ.

მოდიან ახალი პოლიტიკოსები. ძველი პოლიტიკოსებიდან არცერთი არ დარჩება და ეს სიახლე განაახლებს და ახალ სულს შთაბერავს ჩემს ქვეყანას, ჩემს საქართველოს — უნიჭიერესი ქართველები, რომლებსაც მართლაც ესმით, რა არის პოლიტიკა, როგორ უნდა მართონ ქვეყანა. მათ ეს იციან ძალიან კარგად, მათ ეს ისწავლეს საზღვარგარეთ. მაგალითად, ჩემი ქალიშვილი თამარ პატარაია, შვიდი წელი მოღვაწეობდა ბრიტანეთში. კოლეჯიც იქ დაამთავრა და უნივერსიტეტიც. უმაღლესი დონის განათლება მიიღო. მაგრამ არიან პოლიტიკოსები (არ მინდა ახლა ერთი ქალბატონის გვარი დავასახელო), რომლებიც ებრძვიან ისეთ ბავშვებს, როგორიც ჩემი თამარია. მაინც წაგებული ხართ, ქალბატონო! თქვენს სახეს საერთოდ ვერ ვხედავ მომავალში. იმიტომ რომ ქართული პოლიტიკის სირცხვილი ხართ, თქვენი პოლიტიკაში ყოფნა გამართლებული არ არის და ვერც იქნებით, რაც უნდა გააკეთოთ.
ასე რომ, კავკასიაში დიდი ცვლილებები ხდება. იმ გეგმას, რაც რუსეთმა, ირანმა და ერდოღანმა დაისახეს, ასრულება არ აწერია. სომხეთი, უხეშად რომ ვთქვათ, ისევ რუსეთს უძვრება. მაგრამ რომ აყვირდნენ, რას მოიგებენ? ვერაფერს! პირიქით, უფრო გაამწარებენ პუტინს. რუსეთის პრეზიდენტი კი ძალიან ავმეხსიერი კაცია, ყველაფერს იმახსოვრებს.

ახლა მაგონდება ისტორიული ფაქტი, როდესაც ქართველმა მეფემ, დავით აღმაშენებელმა, სომხური სამეფოს დედაქალაქ ანისიდან თურქ–სელჩუკები გარეკა, მერე კი მიზგითად ქცეული ტაძარიც გაათავისუფლა, რომელშიც ტაძრის აღმშენებელი ბერძენთა დედოფალი კატრონიკე იყო დაკრძალული. მეფე დავითმა მაშინ კატრონიკეს საფლავს სამგზის ჩასძახა: „გიხაროდენ შენ, წმინდაო დედოფალო, რამეთუ იხსნა ღმერთმა საყდარი შენი უსჯულოთა ხელთაგან“. რომ იცოდეთ, მაშინ საქართველომ რეალურად მიწის პირისგან აღგვას გადაარჩინა სომხები.

ახლა, რაც შეეხება ჰესებს: აიგება ის ჰესები მხოლოდ, რომლებიც საქართველოს სჭირდება — მავანის ჯიბეს კი არა (ვაი, თქვენს პატრონს!), რაც საქართველოს სჭირდება. თითსაც ვერ გაანძრევთ!!! ასეთია წინასწარმეტყველება. ვხედავ, აქაც უფლის ხელია აღმართული და იგი მართავს ყველაფერს.
კოსმოსიდან წამოსული ენერგია იცავს საქართველოს მიწას, მდინარეებს და ყოველივე იმ სილამაზეს, რაც მსოფლიოში არ არსებობს. განსაკუთრებით წყალთან დაკავშირებით მინდა აღვნიშნო: მსოფლიოში წყლის დეფიციტი იქნება. ეს კი საქართველოსთის ძალიან კარგია იმ მხრივ, რომ ჩვენს ქვეყანაში უამრავი ტბაა, როგორც წარსულში ვთქვი, ჩვენი ქვეყანა წყლებზე „ზის“ — სუფთა წყლებზე. და ეს წყლები უფრო ძვირად ფასობს, ვიდრე ბენზინი. აი, ნახავთ!

რაც შეეხება ტურიზმს, მინდა ვუთხრა პუტინს: ტურიზმს ვერაფრით ვერ შეაჩერებთ, ბატონო პუტინო. მთელი რუსეთი მაინც საქართველოსკენ დაიძვრება სამოგზაუროდ. ეს პანდემიამ შეუშალა ხელი , თორემ არც შეწყვეტდნენ ჩამოსვლას. ასე რომ, ტურიზმი პირველ ადგილს დაიკავებს ქართულ ეკონომიკაში. ეს ყველაფერი ხალხისთვისაა და ხალხი ამოისუნთქავს.
ნუ გეშინიათ, ქართველებო, ტურიზმი ისე განვითარდება ჩვენში, რომ მთელი მსოფლიოს სალაპარაკო იქნება საქართველო — თავისი მშვენიერი ბუნებითა თუ ისტორიული ძეგლებით.
 აზერბაიჯანს ისევ ვაფრთხილებ დავითგარეჯასთან დაკავშირებით: აზერბაიჯანელებო, ფრთხილად იყავით, გარეჯი თქვენი წყევლაა! თქვენ მოშორდებით მაგ ადგილს. უკან–უკან დაიწყებთ დახევას და აუცილებლად მიხვდებით, რომ თქვენი ქვეყნისკენ უარყოფითი ენერგია გარეჯიდან მოდის.

ვხედავ, დავითგარეჯას გასაღებს კოსმოსი ქართველებს უბრუნებს. ამინ!!!
აუცილებლად ყურადსაღებია გელათი. ვხედავ, გელათის წყევლა არ მოაკლდება და დიდ დარტყმას მიიღებს ის ხალხი, ვისაც ეს საკითხი აბარია, ვინც უნდა გააკეთოს. ჩემი რჩევაა, დროზე მიხედოთ გელათს, გააკეთოთ, რაც გასაკეთებელია, თორემ შედეგებს საკუთარი თვალით იხილავთ და ეს ძალიან ცუდია თქვენთვის. ამაყად მომზირალ ქართულ ეკლესიებს ვერ დაანგრევთ და ვერ დაწვავთ, რაც უნდა მოიმოქმედოთ — ახალიც აშენდება და ძველიც შეკეთდება. გელათი არის, იყო და იქნება მუდამ. ამინ!
თურქეთის ახალი არხის, „სტამბულის“ პროექტს, რომელსაც პრეზიდენტი ერდოღანი აქტიურად უჭერს მხარს, განხორციელება არ უწერია. ახლა ერდოღანს სურს, რომ თურქეთს, ასე ვთქვათ, გამტარი ქვეყნის ფუნქცია არ დაეკარგოს და ამიტომაც მოიწადინა ახალი არხის აგება, მაგრამ არაფერიც არ გამოუვა. მე ნაწინასწარმეტყველები მაქვს წარსულში, რომ ამერიკა ბოსფორის სრუტის „გასაღებს“ აართმევს თურქეთს და ის ძალიან რთულ სიტუაციაში აღმოჩნდება. ის იძულებულია, ანგარიში გაუწიოს ამერიკას და არა რუსეთს, რომელიც საომრად ემზადება თურქეთის წინააღმდეგ.

ერდოღანის პოლიტიკა თურქეთს ძალიან რთულ მდგომარეობაში ჩააყენებს. ვხედავ, ხდება ისეთი რაღაცეები, რითაც თითქოს ღმერთი მიანიშნებს, რომ ასე არ უნდა მოიქცეს, მაგრამ ერდოღანი ამას ვერ ხვდება და შეცდომას შეცდომაზე უშვებს — ძალიან დიდ შეცდომებს დაუშვებს.
აი საქართველოს შავ ზღვაში წამოწყებული ყველა პროექტი კი ბოლომდე მივა. ისევ მშენებლობებს ვხედავ. ანაკლიის პორტზე წარსულშიც მაქვს ნაწინასწარმეტყველები და ისევ გავიმეორებ: პორტი აშენდება — გრანდიოზული რამ აშენდება და იქ საქართველოს და ამერიკის დროშა იფრიალებს. ამინ!
ანაკლიის პორტი იქნება ძლიერი დასაყრდენი ბაზა ამერიკისა და ნატოსთვის მთელ შავ ზღვაზე. ეს, რა თქმა უნდა, რუსეთის პრეზიდენტს ძალიან გააღიზიანებს, მაგრამ ვერაფერსაც ვერ იზამს.
კიდევ ვიმეორებ წარსულში ნაწინასწარმეტყველებს: საქართველოს თავისი საზღვაო ფლოტი ეყოლება, წყალქვეშა ნავებიც კი დავინახე. და ეს აუცილებლად ასე მოხდება.
მინდა აღვნიშნო, რომ სომხები მიყუჩდებიან, მაგრამ ისევ ომისთვის ემზადებიან. ყარაბაღში დიდი ცეცხლი დაინთება და დიდი ომები გაგრძელდება.

ვხედავ, ნატოს მიერ უკრაინაში გაგზავნილი იარაღი ორად იყოფა: ერთი ნაწილი მიდის უკრაინაში და მეორე — მოდის საქართველოში. ეს ასეა ასი პროცენტით. შეიძლება ეს ინფორმაცია არ უნდა გახმაურდეს, მაგრამ როგორ არ უნდა გახმაურდეს?! ყველაფერიც უნდა გახმოვანდეს: ნატო ამარაგებს საქართველოს.
ვხედავ, რუსეთს ფაქტობრივად თვითონ რუსი ხალხი მოერევა. შიგნით დაინთება დიდი ცეცხლი, ხალხი დაიწყებს დიდ ომს და ამას პუტინი ვერ შეაჩერებს. ამიტომ სჯობს თავად შეჩერდეს, გამოასწოროს რუსული პოლიტიკა, აღმოფხვრას კორუფცია, რომელშიც რუსეთი იწვის და გაუგონარი რამ ხდება. ფაქტობრივად, მთავრობა არ არის მთავრობა. ამ საშინელებას რუსეთი გვერდს ვერ აუვლის და აი მაშინ არც საქართველო ახსოვთ და არც უკრაინა.
თუმცა პუტინს არც აქვს შანსი, სწორი ნაბიჯები გადადგას და ვითარება შეცვალოს. ის ხასიათის ადამიანია, პატარა რაღაცაზეც რეაქცია აქვს, დაუფიქრებელ ნაბიჯებს დგამს. პატარა ბავშვივითაა, გამიდის და ვტირიო. მაგრამ აღარაფერი აღარ გაუვა, იმიტომ რომ მსოფლიო პოლიტიკაში დიდი ცვლილებები იქნება და ეს ცვლილებები უფლებას არ აძლევს პუტინს, განახორციელოს თავისი მზაკვრული, შავი გეგმები — განსაკუთრებით საქართველოს წინააღმდეგ.

ის სანქციები, რომლებსაც ამერიკა და ევროპა უწესებენ რუსეთს, არ შეჩერდება მანამ, სანამ ამერიკა სასურველ შედეგს არ მიიღებს. სანქციები გრძელდება და ამას ვერავინ ვერ შეაჩერებს. ეს არის დიდი დარტყმა რუსეთის ეკონომიკისთვის. რუსეთის ეკონომიკა არ იარსებებს.
რაც შეეხება საერთაშორისო ბანკთაშორისი ანგარიშსწორების სისტემა „სვიფტს“, რუსეთი აქაც წააგებს. ძალიან დიდ დარტყმას მიიღებს. ვითომ ალტერნატიული რუსული სისტემა არაფრად არ ვარგა. არცერთი რუსი მილიარდერი ამ ხაზით არ გავა. გამორიცხულია! ვხედავ, ყველა გარბის, ფულს მარხავენ. ეს იმას ნიშნავს, რომ რუსი „ბობოლების“, მაღალჩინოსნებისა და მილიონერ–მილიარდერების ყველა ანგარიში გაიყინება. მოკლედ და კონკრეტულად: გაიყინება! და ამ ყინულს ვერავინ ვერ გაალღობს, გარდა რუსეთის ახალი, მომავალი მთავრობისა. თუმცა ესეც კითხვის ნიშნის ქვეშ დგას.
თქვენ წარმოიდგინეთ, თვითონ რუსი ხალხი უარყოფითად არ არის განწყობილი ქართველი ხალხის მიმართ. ხალხი ერთმანეთს პატივს სცემს, ეს ორ კინკილა იდიოტს უნდა მსოფლიო გადაატრიალოს. მაგრა ეგრე არ არის, ბატონებო! ვხედავ, ხალხი ისევ ერთად დგას და რუსები უფრო მორბიან საქართველოში, ვიდრე უცხოელები. და აი ასე ვიცხოვრებთ ხალხი — ტკბილად და მეგობრულად, მთავრობები კი ერთმანეთს გადაჭამენ.
რაც შეეხება გაზსადენის რუსულ პროექტ „ჩრდილოეთის ნაკადი -2–ს“, რაზეც ახლა დიდი ჭიდილი მიდის - ეს პროექტი დაშლილია. ეს გაზსადენი აქამდეც უნდა ამუშავებულიყო — თითქმის დამთავრებულს ვხედავ ყველაფერს, მაგრამ დიდი „არა“ წერია კოსმოსიდან. კოსმოსს კიდევ ვერ დაეჭიდებით, ბატონებო. საქართველოს გზა უფრო მომგებიანი იქნება, ვიდრე რუსეთის ეს გზა. აი ნახავთ!
ვხედავ: მავანს (ხელნაწერში პიროვნების ვინაობა დაკონკრეტებულია, - რედ.) რაც ჩაფიქრებული აქვს, არაფერი არ უსრულდება. მთელმა საქართველომ ზურგი შეაქცია — მთელმა საქართველომ (რეკლამებიც არ შველის) და შარშანდელი თოვლივით გაქრება. მან დაუშვა ის შეცდომა, რაზეც მრავალი წლის განმავლობაში ვაფრთხილებდი წინასწარმეტყველებებში. ყური რომ დაეგდო ჩემთვის, უკეთესი იქნებოდა. ვისაც ყური დაუგდო და ვინც მიითბო, ზუსტად იმათ დაგესლეს, დაკბინეს და უღალატეს.

ჩემს საქართველოში ყველაფერი დამშვიდდება და დაწყნარდება, მაგრამ დღეს ხალხი ძალიან არის გაღიზიანებული — ცალკე იმით, რომ მშიერია, და ცალკე დაწესებული პანდემიური შეზღუდვებით. პირბადის გამო რომ ქუჩაში მიმავალ ადამიანს აჩერებთ და აჯარიმებთ, ფრთხილადიყავით! ეს ძალიან უარყოფით განწყობას იწვევს და ვხედავ, ეს ყველაფერი მუშტი–კრივში გადაიზრდება და პატრულისა თუ პოლიციის ზემოქმედება როლს ვერ ითამაშებს. ხალხს ისე გადაეკეტება გონება, როცა არ იციან, რას სჩადიან. და ეს უკვე რევოლუციაა!", - წერს ლელა კაკულია. 

აგრეთვე დაგაინტერესებთ: 

🔴 საქართველოს მოსახლეობა აკეთებს ყველაფერს, რომ პანდემია კიდევ უფრო გაძლიერდეს - თენგიზ ცერცვაძე

🔴 ვერ ვხედავ რაიმე საფუძველს იმისთვის, რომ დამატებითი შეზღუდვები დაწესდეს - ეკატერინე ტიკარაძე