"ბიძინას სანქცირება სამების და სვეტიცხოვლის არა, მაგრამ საქართველოს ხელისუფლების სანქცირებას ნამდვილად ნიშნავს" - დავით ზურაბიშვილი

ანალიტიკოსი, დავით ზურაბიშვილი სოციალურ ქსელში ბიძინა ივანიშვილის ირგვლივ განვითარებულ მოვლენებზე, მის შესაძლო სანქცირებასთან დაკავშირებით წერს:

"იმდენ ორმხრივ სისულელეს ვკითხულობ ბიძინას სანქცირებაზე, რომ კი არ მინდოდა არაფრის დაწერა, მაგრამ ვიღაცამ ხომ უნდა თქვას, რაღაც რეალობას მიახლოებული მაინც.

სამწუხაროდ მოკლედ თქმა არ გამოდის და იძულებული ვარ ცოტა გრძლად ვთქვა.

ა) ბიძინას არავინ დაადებს არანაირ სანქციებს.

რუსეთის მოქალაქე პუტინისტი ოლიგარქების მხოლოდ ერთი ნაწილია სანქციების ქვეშ და არცერთი სომეხი, არცერთი ყაზახი და არცერთი არაბი ბიზნესმენი.

ახლა ვიღაცას შეიძლება ბიძინა უფრო პუტინისტი ჰგონია ვიდრე მთელი სომხეთი და არაბული სამყარო ერთად აღებული, მაგრამ დასავლეთში ასე არ ფიქრობენ.

აღარაფერს ვამბობ იმაზე, რომ ბიძინას სანქცირება სამების და სვეტიცხოვლის არა, მაგრამ საქართველოს ხელისუფლების სანქცირებას ნამდვილად ნიშნავს (ძალიან გთხოვთ ამაზე სერიოზული კამათი არავინ დამიწყოთ), რაც თავის მხრივ ნიშნავს, რომ საქართველო ჩაეწერება ბელარუსის მსგავსი ქვეყნების რიგში, არც ევროკავშირის კანდიდატად არავინ მიიღებს და საერთოდ სანქცირებული საქართველო გაცილებით მეტად მოექცევა რუსეთის გავლენის სფეროში, თუ საერთოდ რუსეთის სატელიტი არ გახდა.

ეს ყველაფერი ძალიან კარგად ესმით დასავლეთში.

ამიტომაც ელოლიავებიან ამ ხელისუფლებას და მათ ბრიყვულ განცხადებებს ძალიან ფრთხილად და კორექტულად პასუხობენ.

ასევე საგულისხმოა, რომ ბიძინას სანქცირებაზე ოპოზიციის ყიჟინა სერიოზულად აფრთხობს ოცნების ამომრჩეველთა ზომიერ ნაწილს და საგრძნობლად ზრდის პოლარიზაციას და ნაც-ქოცურ ურთიერთაუტანლობას.

ბ) ეს ყველაფერი ბიძინამ არ იცის და ვერც გაიგებს.

ის ძალიან კარგად ფლობს "გათიშე და იბატონე" ტიპის ძალაუფლების ტექნოლოგიებს, მაგრამ საერთაშორისო პოლიტიკაში არის სრული უვიცი და უმეცარი. პლუს ის არის ძალიან ეჭვიანი და მისი ეჭვიანობის ხარისხი მით უფრო იზრდება, რაც უფრო კლებულობს მისი პოპულარობა.

ახლა კიდევ ამას ემატება ახალი გეოპოლიტიკური მოცემულობა, როდესაც ლავირება დასავლეთსა და რუსეთს შორის, რაზედაც მუდმივად თამაშობდა ოცნება, აღარ გამოდის.

შესაბამისად ბიძინა არის ძალიან აჭრილი და ყველგან ელანდება სანქციების აჩრდილი და ნაცების შეთქმულება მსოფლიო მასშტაბით, რაც კიდევ უფრო ზრდის მისი ეჭვიანობის ხარისხს და რაც ვლინდება იმ არაადეკვატურ განცხადებებში, რომლებიც გვესმის ხელისუფლებისგან.

ასეთ განცხადებებს კიდევ ბევრჯერ მოვისმენთ, რადგან ბიძინას გარემოცვაში დღეს მხოლოდ ის ხალხია დარჩენილი, რომელიც მას თვალებში უყურებს, ცდილობს გამოიცნოს რას ფიქრობს ხაზეინი, რათა გულმხურვალედ დაუდასტუროს ეს ფიქრი.

მოკლედ, მის ირგვლივ დღეს არიან ან საკუთარი აზრის არმქონე მონები, ან უპრინციპო მლიქვნელები, რომლებიც ბიძინა რომ ერთს იტყვის, იმას კვადრატში აყვანილს უბრუნებენ უკან.

3. ამ ვითარებაში კარგი ამბავი მხოლოდ ისაა, რომ შიდაპოლიტიკური სპექტრის ნაც-ქოცურ არაადეკვატურობა ნაკლებად განსაზღვრავს საერთაშორისო დღის წესრიგს და საქართველოს ადგილს ამ დღის წესრიგში.

დასავლეთი არ აპირებს საქართველო დაუთმოს რუსეთს, ამიტომ ყველანაირად შეეცდებიან ეს ქვეყანა მიათრიონ არჩევნებამდე და მანამდე რამე ინსტიტუციური რეფორმის იმგვარი მაინც გამოღლიტონ ქოცებს "ყვავს კაკალი გააგდებინე" პრინციპით. აი, არჩევნებზე რა მოხდება და როგორ, ეგ კიდევ ცალკე თემაა, მაგრამ ამას აქ არ დავწერ.

ეჭვი მაქვს ორმხრივ რისხვას გამოვიწვევ, მაგრამ სიმართლე თუ გინდათ ესაა და თუ არ გინდათ გაგება, ნუ გინდათ.

მეტი არაა ჩემი მტერი მე მაგაზე არ ვიდარდო.

P. S. უზრდელობებს, შეურაცხყოფებს და გამორჩეულ სისულელეებს გაუფრთხილებლად ვშლი და გამეორების შემთხვევაში ვბლოკავ",- წერს დავით ზურაბიშვილი ფეისბუკზე.

ამავე თემაზე:

* ვატო შაქარიშვილი ამბობს, რომ ბიძინა ივანიშვილის დასანქცირების მოთხოვნა არის სამების ეკლესიის აშენების დასანქცირება