დაიცავით დოზა, თორემ შესაძლოა წამალი, საწამლავად იქცეს - ექიმის რჩევები

"dosis facit venenum" - ანუ ზომა-წონის დეტერმინიზმი

"დოზა ქმნის შხამს" - ნამდვილად ასეა და პირველ რიგში მედიცინაში.

რამდენიმე მაგალითი:

•გულის კუნთის ინფარქტის დროს ვენაში გაკეთებული 5-10 მგ მორფინი საოცრებას მოახდენს - მოგიხსნის გაუსაძლის ტკივილს, შიშს, პანიკას, ჰაერის უკმარისობას, განტვირთავს გულის preload-ს, დასწევს მაღალ წნევასაც და ამგვარად შეამცირებს ჟანგბადის მოხმარებას.

აი, უინფარქტოდ ვენაში გაკეთებული ამ დოზის 2-3 ჯერ მეტი, შეიძლება შენი სამუდამო ძილის მიზეზი გახდეს, მით უმეტეს განსაკუთრებული ჯგუფის ადამიანებში!

• ესციტალოპრამის 5 მგ შეამცირებს შენს პანიკურ შეტევებს, მაგრამ იგივე ესციტალოპრამის 20 მგ დიდი ალბათობით  თავად გამოიწვევს პანიკურ შეტევას.

• თვეში რამდენჯერმე მიღებული ციტრამონი  გაგიყუჩებს თავის ტკივილს, ყოველ (მეორე) დღეს მიღებული იგივე წამალი, მალე თავად გახდება შენი თავის ტკივილის მიზეზი.

• ხანგრძლივი, მაღალი დოზით, ხშირად არამიზანშეწონილი ანტიბიოტიკის მოხმარება თავად იწვევს ინფექციას. სოკოვან ინფექციას არ ვგულისხმობ (ეს ბანალური და ბუნებრივია). არა, ბაქტერიულ ინფექციაზე ვლაპარაკობ!

• ანტიარითმიული პრეპარატების დიდი ნაწილი დოზის მინიმალური შეცვლით იწვევს (სერიოზულ) არითმიებს. 

ასევე - ნუ მიიღებთ საქართველოში ძალიან ტრენდული კორდარონი/კორდარექსი (შემცველი ნივთიერება: ამიოდარონი) თვითნებურად, ან მეგობრის რეკომენდაციით!რადგან ეს არის ძალიან კომპლექსური და ხანგრძლივმოქმედი ანტიარითმიული პრეპარატი, აქვს გავლენა სხვა ორგანოებზეც (ფარისებრი, ფილტვი...), რომლის დანიშვნაზე  სახლის პირობებში კარდიოლოგიც ორჯერ დაფიქრდება.

შემიძლია უსასრულოდ გავაგრძელო ჩამოთვლა, მაგრამ არსი ერთია:

მედიკამენტის დოზა წყვეტს, ეს მედიკამენტი დაგეხმარება, გიმკურნალებს თუ გავნებს, თუ მოგკლავს!

გთხოვთ, ძალიან ფრთხილად იყავით წამლის დოზების თვითნებურად ცვლასთან!

თუ სხვის მაღალ წნევას კარგად აკონტროლებს 10 მგ ამლოდიპინი, ან ნიფედიპინი, თქვენ შეიძლება 10 მგ ნიფედიპინმა ისე დაგიგდოთ წნევა, რომ გონება დაკარგოთ!  ან სწრაფად, რადიკალურად დაწეული წნევის გამო გახდეთ იშემიური ინსულტის მსხვერპლი და დაკარგოთ ბევრი ნევროლოგიური ფუნქცია. არადა, რომ დაგეწყოთ ექიმის მიერ დანიშნული ამლოდიპინი თავიდან 2,5 მგ დოზირებით, ეს არ დაგემართებოდათ!

მედიკამენტის დოზა, როგორც ხედავთ, ძალიან ხშირად  ძალიან ინდივიდუალურია.

ჩემი მიზანი არ არის თქვენი შეშინება,
პირიქით!

მინდა გაგიზიაროთ ის ელემენტარული სამედიცინო და ფსიქოლოგიური ინფორმაცია, რომელიც დაგიცავთ საზიანო შეცდომებისგან და პარალელურად მეტ ცოდნას მოგცემთ საკუთარ ორგანიზმზე.

dosis facit venenum - პარაცელსუსის ეს ლაკონიური ტრიოლი, არ ეხება მხოლოდ ფარმაკოლოგიურ დოზირებას:

ბედნიერება, წარმატება, ჯანმრთელობა, ოპტიმიზმი, კარიერა, სიყვარული, თავისუფლება ... ეს ყველაფერიც სწორი დოზირების ურჩ კანონს ემორჩილება და მხოლოდ სათანადო დოზით ავლენს საუკეთესო და სასურველ ეფექტს ⚖

ჯანმრთელობას და სულიერ სიმშვიდეს გისურვებთ!

თქვენი ჰაუსი - მედიცინა და ფსიქოლოგია