ფსიქიატრი: კანონმდებლობის გამკაცრებასთან ერთად, აუცილებელია, ძალიან დიდი კამპანია დაიწყოს და ჩაერთოს ბევრი სპეციალისტი. შედეგები ნამდვილად სავალალოა. კანაფის მოხმარების შემდეგ მხოლოდ შიზოფრენიის დიაგნოზი 10%-ით არის გაზრდილი

წამლები, რომლებსაც ადამიანები ფსიქოტროპულს ეძახიან, მათი მოხმარება არის გაუკუღმართებული. ამის სავალალო შედეგებს ჩვენ ძალიან ხშირად ვხედავთ, - განაცხადა „დღის ქრონიკაში“ ფსიქიატრმა, ნინო მენაღარიშვილმა ანტინარკოტიკულ რეფორმაზე საუბრისას.

მან ისაუბრა, რამდენად მწვავედ დგას ქვეყანაში ანტინარკოტიკული რეფორმის გატარების საკითხი.

მისივე თქმით, ძალიან ხშირად ეჯახებიან ფსიქიატრიულ პრობლემებს, რომელიც გამოწვეულია სხვადასხვა ტიპის ნარკოტიკულ და არა ნარკოტიკულ ნივთიერებაზე დამოკიდებულებით, რომლებიც თავის მხრივ სამკურნალოდ შეიქმნა.

„მაგალითად, ის წამლები, რომლებსაც ადამიანები ფსიქოტროპულს ეძახიან, მათი მოხმარება არის გაუკუღმართებული. ამის სავალალო შედეგებს ჩვენ ძალიან ხშირად ვხედავთ და კიდევ უფრო მეტად გაბევრებულია ეს.

ჩვენი ქვეყანა გარკვეულ განვითარებას გადის. ჩვენ გამოვედით 90-იანი წლებიდან, სადაც ნარკოდამოკიდებულება ასევე აქტუალური იყო და შევედით ამ ფაქტობრივად, თავისუფალ მოხმარებაში, სადაც ორი თაობა ერთმანეთს გადაემიჯნა. უფრო მეტად არის გაბევრებული მოხმარებაც და მოხმარების შემდგომი სირთულეებიც“, - აღნიშნა მენაღარიშვილმა.

მისივე თქმით, კანონმდებლობის გამკაცრება აუცილებელი იყო.

„ამასთან, კანონი რაც არ უნდა გამკაცრდეს, ადამიანის ბუნება ისეთია, რომ აუცილებლად, მაინც მოიფიქრებს ალტერნატიულ გზებს. მთავარია, რომ ამ გამკაცრებასთან ერთად, ძალიან დიდი პროპაგანდა, კამპანია დაიწყოს და ჩაერთოს ბევრი სპეციალისტი, თუნდაც ის ადამიანები, რომელთაც გამოცდილებაში აქვთ მოხმარება, თუ რამდენად ცუდია. ჩვენ არ ვამბობდით, არ ვყვიროდით ხმამაღლა, რომ ეს ცუდია“, - განაცხადა ფსიქიატრმა.

მისივე თქმით, აღნიშნულის შედეგები ნამდვილად სავალალოა. კანაფის მოხმარების შემდეგ მხოლოდ შიზოფრენიის დიაგნოზი 10%-ით არის გაზრდილი.