ირაკლი კირცხალია: საზოგადოების დაკვეთაა, რომ ვეღარ იქნება ისეთი ხელისუფლება, რომელიც რომელიმე ქვეყნის გავლენის ქვეშ მოექცევა. კეთილი ინებოს თითოეულმა ჩვენმა პარტნიორად წოდებულმა, რომ ღირსეულ საფუძვლებზე იყოს მზად თანამშრომლობისთვის

კიდევ ერთხელ ვამბობ, ნამდვილად არ მინდა გავაიგივო ამერიკელ ხალხთან და ორ ქვეყანას შორის ურთიერთობასთან ეს ჯგუფი, რომელიც დღეს „ნაციონალური მოძრაობისა“ და მათი დანაყოფების ლობისტად გვევლინება საქართველოში, - განაცხადა გადაცემა „დღის ქრონიკაში“ საპარლამენტო ფრაქცია „ქართული ოცნების“ თავმჯდომარის პირველმა მოადგილე ირაკლი კირცხალიამ „MEGOBARI აქტზე“ საუბრისას.

მისი თქმით, ამას ყოველთვის ამბობდა, რომ ორ სახელმწიფოს შორის ურთიერთობაში არ აიგივებენ.

„ამიტომ ვთქვი, რომ შევხედოთ, დავაკვირდეთ რა გზას გაივლის ეს დოკუმენტი. სუფთა პოლიტიკური თვალსაზრისით ვამბობ და არ შევდივარ დოკუმენტის შინაარსში. სწორედ იმიტომ არ შევდივარ, რომ პოლიტიკური ასპექტი და პოლიტიკური ჭრილით ვუყურებ ამ ყველაფერს. თუ მივა პრეზიდენტის ხელმოწერამდე, მერე განვსაზღვრავთ ხელმოწერის ან არ მოწერის შემდეგ, თუ რა ვითარებაშია და რა სტადიაზეა ჩვენი ურთიერთობა. ფურცელზე დაწერილი სტრატეგიული თანამშრომლობა გადაიზრდება თუ არა რეალურ თანამშრომლობაში. ამას ყველანი კარგად ვნახავთ.

ახლა, რაც შეეხება ჩვენს დამოკიდებულებას, ჩვენი დამოკიდებულება ჯო უილსონის და მისნაირების [მიმართ], „მეგობარი აქტის“ მიღება არ მიღებით არ იცვლება. ჩვენ ღია პოზიცია გვაქვს დაფიქსირებული, რომ მზად ვართ არა მხოლოდ ურთიერთობების გადატვირთვისთვის, არამედ თვისობრივად ახალი ურთიერთობების დასაწყებად ამერიკის შეერთებულ შტატებთან. ასე, რომ შევხედოთ.

უახლოეს ისტორიას რომ გადავავლოთ თვალი ჩვენზე მეტი პარტნიორი, ჩვენზე მეტი მეგობარი რეგიონში ამერიკის შეერთებულ შტატებს არ ჰყოლია. არ დაგვავიწყდეს ერთი, საზოგადოებას მივმართავ, როგორც ჩვენ გვჭირდება ამერიკის შეერთებული შტატების პარტნიორობა, ასევე სჭირდება მას. როგორც ჩვენ გვჭირდება ევროკავშირთან ურთიერთობა, ასევე სჭირდება ევროკავშირს ჩვენთან ურთიერთობა. ყოველთვის გამოვდივართ ჩვენ ღირსეული საფუძვლებიდან, როდესაც პარტნიორობაზეა საუბარი და არა რაღაც მონურ, ვასალურ მდგომარეობაში ყოფნისას. ეს არის საზოგადოების დაკვეთა, რომ საქართველოში ვეღარ იქნება ისეთი ხელისუფლება, რომელიც რომელიმე ქვეყნის გავლენის ქვეშ მოექცევა. საქართველოში იქნება ყოველთვის ის ხელისუფლება და „ქართული ოცნება“ ამის გარანტიაა, ამას ამაყად და თამამად ვამბობ, რომელიც ყველაფერს გააკეთებს და გააკეთა იმისთვის, რომ საქართველოში მიიღებოდეს გადაწყვეტილება, პირველ რიგში ჩვენი ქვეყნის საუკეთესო ინტერესებიდან გამომდინარე. ჩვენი ქვეყნის სუვერენიტეტის ინტერესიდან გამომდინარე, ჩვენი დამოუკიდებლობიდან გამომდინარე და ჩვენი ქვეყნის უსაფრთხოებიდან გამომდინარე.

კეთილი ინებოს თითოეულმა ჩვენმა მეგობარმა და პარტნიორად წოდებულმა, რომ ღირსეულ საფუძვლებზე იყოს მზად ჩვენთან თანამშრომლობისთვის და არა იმ ორმაგი სტანდარტებით, რასაც ანთხევენ 2022 წლის შემდეგ“, - აღნიშნა ირაკლი კირცხალიამ.
მისივე თქმით, უკვე ღიად და პირდაპირ ეთერში გამოვიდნენ ამ პოლიტიკურ ავანსცენაზე მათი პატრონები ამერიკის შეერთებული შტატებიდან იქნება თუ ევროკავშირის წევრი ქვეყნებიდან.

„ცდილობენ შექმნან პოლიტიკური ამინდი იმ დესტრუქციული ძალიდან, იმ განულებული ძალიდან, რასაც „კოლექტიური ნაცმოძრაობა“ და მათი დანაყოფები ჰქვია. როგორ გამოსდით ეს პოლიტიკური ამინდის შექმნა, ამ ყველაფერს ხალხმა გასცა არაერთხელ პასუხი არაერთ არჩევნებზე. ამ არჩევნებზეც მეათედ და საიუბილეოდ გასცემს პასუხს მათ ასეთ ქმედებებს და მათ ასეთ აგენტურულ ქცევებს, აქ ამ აგენტურულ ქსელს და უფრო მაღალ წონიან აგენტებს, რომლებიც ოპერირებენ ამერიკის შეერთებული შტატებიდან თუ ევროკავშირის წევრი ქვეყნებიდან“, - განაცხადა ირაკლი კირცხალიამ.

აშშ-ის წარმომადგენელთა პალატამ „მეგობარი აქტის“ სახელით ცნობილ კანონპროექტს მხარი დაუჭირა.