ლევან მახაშვილი: ორი მხრივ არის მნიშვნელოვანი ეს ყრილობა ჩვენთვის. პირველი ის, რომ ავირჩევთ ახალ ხელმძღვანელს და მეორე - გვექნება შესაძლებლობა ვისაუბროთ ისეთ თემებზე, რომლებიც მნიშვნელოვანია ჩვენთვის, მოსახლეობისთვის, ქვეყნისთვის

პარლამენტის ევროინტეგრაციის კომიტეტის თავმჯდომარე ლევან მახაშვილი 7 მაისს დაგეგმილ „ქართული ოცნების” ყრილობას ეხმიანება და აღნიშნავს, რომ ის ორი მხრივ არის მნიშვნელოვანი - მოხდება ხელმძღვანელის არჩევა და ასევე შედგება ისეთ თემებზე საუბარი, რომლებიც პარტიის მომავალ გეგმებს, მოსახლეობას და ზოგადად ქვეყანას ეხება.

„ორი მხრივ არის მნიშვნელოვანი ეს ყრილობა ჩვენთვის. პირველი ის, რომ დიახაც, ახალ ხელმძღვანელს ავირჩევთ და პარტიულ გადაწყვეტილებას მივიღებთ, ეს იქნება პოლიტიკური საბჭოს თუ სხვა გადაადგილებები, რაც შეიძლება საჭირო იყოს პარტიისთვის იმიტომ, რომ ვემზადებით ადგილობრივი თვითმმართველობის არჩევნებისთვის და ამ გათვლითაც, რა თქმა უნდა, ვიღებთ ამ გადაწყვეტილებებს, რომ მაქსიმალურად მომზადებულები შევხვდეთ პარტიული თვალსაზრისით და მეორე, ბუნებრივია, როდესაც ამხელა შეკრებაა, ჩვენ გვექნება შესაძლებლობა, რომ ვისაუბროთ ისეთ თემებზე, რომლებიც მნიშვნელოვანია ჩვენთვის, მოსახლეობისთვის, ქვეყნისთვის“, - განაცხადა მახაშვილი.

„ქართული ოცნება“ ხვალ ყრილობას გამართავს. მმართველი გუნდი სრული შემადგენლობით პარტიის ცენტრალურ ოფისში შეიკრიბება. გადასაწყვეტია, ვინ შეცვლის ირაკლი ღარიბაშვილს და როგორ განახლდება პოლიტსაბჭოს შემადგენლობა.

25 აპრილს პარტია „ქართული ოცნების“ თავმჯდომარემ ირაკლი ღარიბაშვილმა თანამდებობა დატოვა.