"კახი, არ გადადგე!...რა საჭიროა, უკვე ხომ დაიჭირეს ხალხი. დაბალი ღობე ხო გამოჩნდა" - მამუკა ხაზარაძე

"ლელოს" ერთ-ერთი დამფუძნებელი მამუკა ხაზარაძე, ვაკის პარკში მომხდარ ტრაგედიასთან დაკავშირებით პასუხისმგებელი პირების დაკავების შესახებ ინფორმაციას ეხმაურება და თბილისის მერს, კახი კალაძეს მიმართავს:

"კახი, არ გადადგე!..

რა საჭიროა, უკვე ხომ დაიჭირეს ხალხი. დაბალი ღობე ხო გამოჩნდა... ეს შენ არ გეხება, შენ მარტო კარგი ამბები - ლენტის გაჭრა, ფეიერვერკები.... მეგონა საქართველოს ნაკრები გუნდის გამოყვანა მოედანზე რაღაცას ნიშნავდა, თურმე არაფერს.

თუ შენს გუნდელებს დაიჭერენ, შენ ხომ გადარჩები.

არ გადადგე, ჯობია ბოლომდე ყველამ დაინახოს, განსაკუთრებით თბილისმა, როგორი თავკაცი არ უნდა ჰყავდეს ქალაქს!

შეიძლება ფიქრობ, რომ ამ ქალაქში ყველაფერი მოსულა.

არა - გეშლება! ამ ქალაქში ყველაფერი არ მოსულა!

არ ვაპირებდი ამის დაწერას, მეგონა, რომ განიცდიდი - ეს ფოტო ბავშვთან რა იყო? ლაზარეს რას ერჩოდი?
არ გადადგე!

იქნებ მიხვდეს ყველა როგორი თბილისი არ გვჭირდება.

ვახ, მაინც როგორ მეგონა, რომ გუნდის კაპიტნობა სხვა რამე იყო შენთვის....", - წერს ხაზარაძე.

ცნობისთვის, დღეს ვაკის პარკის ტრაგედიაზე 9 პირი დააკავეს.  

13 ოქტომბერს, ვაკის პარკში თამაშისას ბავშვებს ბურთი შადრევანში ჩაუვარდათ, მისი ამოღების დროს, სამ არასრულწლოვანს დენმა დაარტყა. ერთ-ერთი მოზარდი, 13 წლის გოგონა კლინიკაში გარდაიცვალა. ორი საავადმყოფოში იყო გადაყვანილი, რომლებიც კლინიკებიდან უკვე გაწერეს.

შინაგან საქმეთა სამინისტრომ მომხდარზე გამოძიება სისხლის სამართლის კოდექსის 240-ე პრიმა მუხლის პირველი ნაწილით დაიწყო, რაც ელექტრო ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს. დანაშაული 3-დან 4 წლამდე პატიმრობას ითვალისწინებს. 

ამავე თემაზე:

* „არ ვწერ იმ ადამიანებისთვის, ვისაც 3 დღეა მეტი საქმე არ აქვს და იმას ამტკიცებენ, ბავშვის სიკვდილი გაუხარდა და მაგიტო იცინოდაო“ - ქეთა ციცქიშვილი