ლაშა დოლიძემ დმანისის მუნიციპალიტეტის სოფელ განახლებაში საპილოტე საძოვრები მოინახულა

გარემოს დაცვისა და სოფლის მეურნეობის მინისტრის მოადგილე ლაშა დოლიძე, კავკასიის რეგიონული გარემოსდაცვითი ცენტრის (REC Caucasus) დირექტორ სოფიკო ახობაძესთან ერთად, სოფელ განახლებაში იმყოფებოდა, სადაც პროექტის - „საქართველოს მიწის დეგრადაციის ნეიტრალური ბალანსის მიზნების მიღწევა დეგრადირებული საძოვრების აღდგენისა და მდგრადი მართვის გზით“ - ფარგლებში მოწყობილი საძოვრები დაათვალიერა და ფერმერებს შეხვდა.

„გარემოს დაცვისა და სოფლის მეურნეობის სამინისტრო გააგრძელებს ადგილობრივი ფერმერების მხარდაჭერას როგორც საკანონმდებლო, ისე პრაქტიკულ დონეზე, რათა მდგრადი ძოვების პრაქტიკა და საძოვრების მართვის ეფექტიანი მოდელები დაინერგოს ქვეყნის სხვადასხვა რეგიონში“, - განაცხადა ლაშა დოლიძემ.

კავკასიის რეგიონული გარემოსდაცვითი ცენტრის (REC Caucasus) მიერ პროექტის ფარგლებში, მთელი რიგი მნიშვნელოვანი ღონისძიებები განხორციელდა: 268 ჰა ფართობის საძოვარზე დაინერგა კონტროლირებადი ძოვების სისტემა, რაც ხელს უწყობს ბუნებრივი რესურსების დაცვას და ბალახოვანი საფარის აღდგენას; 40 ჰა საძოვარი დაიყო 8 ნაკვეთად, ბენეფიციარ ფერმერებთან ერთად შემუშავდა ძოვების კალენდარი და მესამე წელია, მიმდინარეობს ნაკვეთმორიგეობითი ძოვება; მოეწყო წყალმომარაგების ინფრასტრუქტურა; მოეწყო საჩრდილობელი სივრცეები: დაირგო 40 ადგილობრივი ხის ნერგი (იფანი და პანტა); გაიწმინდა 16 ჰა ტერიტორია.

„სოფელ განახლებაში პროექტის ფარგლებში შექმნილი საძოვრები ცხადყოფს, რომ ინტეგრირებული სოფლის მეურნეობის გზით ერთდროულადაა შესაძლებელი ბუნებრივი რესურსების აღდგენა და ფერმერთა ეკონომიკური
გაძლიერება. აღსანიშნავია ის ფაქტიც, რომ პროექტის ფარგლებში შეიქმნა ერთ-ერთი პირველი საძოვრებით მოსარგებლეთა გაერთიანება, რომლის წევრებს გადაეცათ რძის ჰიგიენური წარმოებისა და ცხოველთა მოვლისთვის საჭირო აღჭურვილობა; ჩატარდა ტრენინგები მეცხოველეობის, ცხოველთა ჯანმრთელობისა და რძის პროდუქტების წარმოების თემებზე“, - აღნიშნა სოფიკო ახობაძემ.

ადგილობრივი ფერმერის, შიო ზვიადაურის განცხადებით, პროექტის ფარგლებში მოწყობილმა საძოვრებმა დროისა და რესურსების დაზოგვის შესაძლებლობა გააჩინა. საქონელი მთელ დღეს საძოვარზეა და უზრუნველყოფილია წყლითა და ჩრდილით. შედეგად, გაიზარდა როგორც ხორცის გამოსავლიანობა, ისე პირუტყვის რაოდენობა.

პროექტი „საქართველოს მიწის დეგრადაციის ნეიტრალური ბალანსის მიზნების მიღწევა დეგრადირებული საძოვრების აღდგენისა და მდგრადი მართვის გზით“ საქართველოს გარემოს დაცვისა და სოფლის მეურნეობის სამინისტროს ინიცირებით, გაეროს სურსათისა და სოფლის მეურნეობის ორგანიზაციის (FAO) და კავკასიის რეგიონული გარემოსდაცვითი ცენტრის (REC Caucasus) მიერ გლობალური გარემოსდაცვითი ფონდის (GEF) დაფინანსებით ხორციელდება.