"მამა რომ დააკავეს, დედა გახდა შეუძლოდ და 4 საათის განმავლობაში სასწრაფოს გამოძახების უფლება არ მისცეს - სახლში დანაშაულებრივი და უკანონო გზით ჩაგვიდეს ორი იარაღი"

სუსის ყოფილი მაღალჩინოსანი სოსო გოგაშვილის შვილი ნინი გოგაშვილი, სოციალურ ქსელში მამამისის დაკავებას ეხმაურება და უშუალოდ დაკავების პროცესის შესახებ წერს:

"მამა  დააკავეს და გადაიყვანეს წინასწარი დაკავების იზოლატორში.

მამას ფიზიკური დაზიანებები აქვს მიყენებული დაკავების პროცესში ყბის, ხელების, ზურგისა და ფეხების არეში, რაც განხორციელდა უშუალოდ შინაგან საქმეთა სამინისტროს გენერალური ინსპექციის უფროსის მოადგილის, ღამბაშიძისა და მისი თანმხლები პირების მიერ ჩემი ოჯახის წევრების თანდასწრებით.  

ასევე დაკავების პროცესში დედა გახდა შეუძლოდ და 4 საათის განმავლობაში სასწრაფოს გამოძახების უფლება არ მისცეს.

სახლში დანაშაულებრივი და უკანონო გზით ჩაგვიდეს ორი იარაღი, მატერიალური დოკუმენტაცია და ინფორმაციის მატარებელი ნივთები!

არ შეგრჩებათ მკვლელებო!!!",-  წერს ნინი გოგაშვილი სოციალურ ქსელში.

სახელმწიფო უსაფრთხოების სამსახურის უფროსის ყოფილი მოადგილე, სოსო გოგაშვილი სპეცოპერაციის შედეგად საკუთარ სახლში გვიან ღამით აიყვანეს.

ცნობისთვის, სოსო გოგაშვილმა გუშინ დაწერა, რომ არჩევნების გაყალბების მტკიცებულებები ჰქონდა, რომელიც "შესაბამის ორგანიზაციას" გადასცა. რამდენიმე დღის წინ კი გია გაჩეჩილაძემ (უცნობი) აუდიოჩანაწერი გაავრცელა, რომელიც მთავარი არხის ჟურნალისტების ფარული მიყურადებით იყო მოპოვებული. აღნიშნულ აუდიოჩანაწერში საუბარი იყო სოსო გოგაშვილზეც.

სოსო გოგაშვილმა ქართული ოცნება 2020 წლის ოქტომბერში დატოვა. ის სახელმწიფო უსაფრთხოების სამსახურის უფროსის მოადგილედ 2015-2018 წლებში მუშაობდა. 2014 წელს შსს-ს გენინსპექციის უფროსი იყო. გოგაშვილი ხელმძღვანელობდა პანკისის ხეობაში ჩატარებულ სპეცოპერაციას, რა დროსაც 19 წლის თემირლან მაჩალიკაშვილი მოკლეს.

ასევე დაგაინტერესებთ:

📍"გპირდებით პირველ ხილს და წვენს მე შემოგაწვდით "პერედაჩაზე"- კარმა უზენაესი სასამართლოა ჩვენნაირი მოკვდავებისთვის ბატონო სოსო" - დეა აფციაური

📍კაცი, რომელმაც პროტესტის ნიშნად პარლამენტთან ბენზინი გადაისხა გარდაიცვალა