პარტიამ "ლელო საქართველოსთვის" თბილისის მერობის კანდიდატად ანა ბიბილაშვილი წარადგინა

პარტიამ "ლელო საქართველოსთვის" თბილისის მერობის კანდიდატად ანა ბიბილაშვილი წარადგინა, საკრებულო სიის პირველი ნომერი კი - ბადრი ჯაფარიძეა.

მამუკა ხაზარაძის განცხადებით, ანა ბიბილაშვილი არის პროფესიონალი, ურბანისტი, არქიტექტორი, რომელსაც კონკრეტული ხედვა აქვს, არის მოწოდებული, რომ ქალაქის პრობლემები სხვანაირად იქნეს გააზრებული.

"ლელო" შეიქმნა, რათა მან გზა და ასპარეზი გაუხსნას ახალ სახეებს, პროფესიონალებს, რადგან ამ ქალაქს, ამ ქვეყანას სჭირდება მიზანი, გადატვირთვა, ახლებური გააზრება, თუ როგორი ქალაქი გვჭირდება ჩვენ.

სწორედ ამ განწყობით გვინდა, შემოგთავაზოთ ადამიანი, წარმატებული ქალი, წარმატებული დედა, პროფესიონალი, ურბანისტი, არქიტექტორი, პროფესორი, რომელიც ასევე იღებდა მონაწილეობას სადოქტორო პროგრამებში ლისაბონში – ანა ბიბილაშვილი.

ანა, რომელსაც აქვს კონკრეტული ხედვა, არის ჩვენი თანამებრძოლი, „ლელოს“ დამფუძნებელი, არის მოწოდებული, რომ ქალაქის პრობლემები იქნეს აბსოლუტურად სხვანაირად გააზრებული.

მინდა, მოგიწოდოთ ყველას, მხარი დაუჭირეთ „ლელოს“, მხარი დაუჭირეთ ნებისმიერ ოპოზიციურ პარტიას, რადგან დღეს გვამოძრავებს საერთო მიზანი, ბრძოლა შიმშილის, სიღატაკის, უმუშევრობის, რაც ყველაზე მთავარია, ნიჰილიზმის წინააღმდეგ", – განაცხადა მამუკა ხაზარაძემ.

2021 წლის თვითმმართველობის არჩევნები 2 ოქტომბერს გაიმართება.