რევაზ ბოჭორიშვილი: უახლესი კვლევით, 2 ჯერ აცრა და "ბუსტერის" გაკეთება "ომიკრონით" ინფიცირებისას ამცირებს სიკვდილიანობის მაჩვენებლებს

საფრანგეთში მცხოვრები ქართველი ექიმი, რევაზ ბოჭორიშვილი კორონავირუსის ახალ ვარიანტ "ომოკრონზე" უახლოეს ინფორმაციას სოციალურ ქსელ ფეისბუკში აქვეყნებს.

"დღეს გამოქვეყნდა საფრანგეთში კოვიდ 19-ის, მე 2 და მე 5 ტალღების სტატისტიკა, შემთხვევების სიხშირის, ჰოსპიტალიზაციისა და გარდაცვალების მაჩვენებლების შედარებით.

ამჟამინდელი მე-5 ტალღის ახალი შემთხვევების ზრდის დინამიკა შარშანდელი მე-2 ტალღის დინამიკის ანალოგიურია, ამასთან წლევანდელმა სიხშირემ უკვე გადააჭარბა შარშანდელი შემოდგომის მე-2 ტალღის პიკს.

სამაგიეროდ, საავადმყოფოში მოხვედრის და რაც მთავარია გარდაცვალების მაჩვენებლები დაახლოებით ორჯერაა შემცირებული.

და ესაა მთავარი.

შარშან შემოდგომაზე უკვე მეტ ნაკლებად ერკვეოდნენ კოვიდის კლინიკური ფორმების მართვასა და მკურნალობაში. მას შემდგომ, ამ მხრივ დიდი არაფერი შეცვლილა.

ერთადერთი სიახლე ვაქცინაციაა, რომელიც იანვარში დაიწყო და დღეისათვის მოსახლეობის 80%-ზე მეტი 2 დოზითაა აცრილი, ხოლო 20 % ს უკვე “ბუსტერი“ აქვს გაკეთებული.

და სწორედ ამის წყალობითაა შემცირებული კოვიდის საშუალო და განსაკუთრებით მძიმე ფორმებით დაავადება, რაც ჰოსპიტალიზაციას საჭიროებს.

სიკვდილიანობის მნიშვნელოვანი კლებაც ამით აიხსნება ძირითადად.

დიახ, აცრილებიც ავადდებიან კოვიდით, განსაკუთრებით მე-2 დოზის გაკეთებიდან 5-6 თვეზე მეტის გასვლის შემდეგ, მაგრამ როგორც, წესი საავადმყოფოში არ ხვდებიან.

და ესაა მთავარი, ჯანდაცვის სისტემის გადატვირთვა აღარ ხდება.

“ბუსტერის“ გაკეთება კი მნიშვნელოვნად ამცირებს ზოგადად ავადობას.

“ომიკრონის“ შესახებ ბოლო მონაცემები აჩვენებს, რომ 2 ჯერ აცრა და განსაკუთრებით “ბუსტერის“ გაკეთება ასევე ამცირებს ამ მძიმე შემთხვევებისა და სიკვდილიანობის მაჩვენებლებს.

ასე რომ, დასკვნის გაკეთება ადვილია.

აიცერით", - წერს ბოჭორიშვილი.

ამავე თემაზე:

🔲 ომიკრონის პირველი სავარაუდო შემთხვევა საქართველოში - ლუგარში საეჭვო ნიმუშებს იკვლევენ