სააკაშვილისთვის ვინმეს რომ ეთქვა, ციხეში სულხან მოლაშვილივით სიგარეტს მოგაწვავენო, ისევ ღიმილით შევიდოდა? - თამაზ მოლაშვილი

სულხან მოლაშვილის მამა თამაზ მოლაშვილი საქართველოს მე-3 პრეზიდენტის, მიხეილ სააკაშვილის დაკავებას სოციალური ქსელით ეხმაურება. 

როგორც ის აღნიშნავს, ციხეებში ისევ ისე რომ აწამებდნენ პატიმრებს, როგორც სულხან მოლაშვილს, სააკაშვილი ალბათ იქ ღიმილით აღარ შევიდოდა.

"​როდესაც ტელევიზორში ვნახე, სააკაშვილი საპატიმროში შეჰყავდათ, ვიფიქრე, მისთვის ვინმეს რომ ეთქვა, ციხეში როგორც სულხან მოლაშვილს აწვავდნენ ზურგზე სიგარეტის ნამწვს, ისე მოგაწვავენო, როგორ ხასიათზე შევიდოდა, ისევ ღიმილით?

როდესაც სულხან მოლაშვილს აწამებდნენ ფეხებზე, ზურგზე, სურათებს უღებდნენ და სააკაშვილთან მიჰქონდათ. მე მომდიოდა ეს ამბები.

მასთან შეხვედრაზე ვოცნებობდი, იქნებ როგორმე იარაღი მქონოდა მაგრამ ვერ ვეღირსე", - წერს თამაზ მოლაშვილი.

ცნობისთვის, კონტროლის პალატის ყოფილი თავმჯდომარე სულხან მოლაშვილი 2004 წლის აპრილში, სამსახურებრივი უფლებამოსილების ბოროტად გამოყენებისა და კორუფციის ბრალდებით, დააკავეს.

2005 წლის სექტემბერში სასამართლომ მას ცხრა წლით თავისუფლების აღკვეთა მიუსაჯა.

2004 წელს მოლაშვილმა მისი წამების და ღირსების შემლახველი მოპყრობის ფაქტზე ევროპის ადამიანის უფლებათა სასამართლოს მიმართა, რომელმაც 2014 წელს დაადასტურა, რომ მოლაშვილი მართლაც იყო წამებისა და არაადამიანური მოპყრობის მსხვერპლი.

სტრასბურგის სასამართლომ საქართველოს სახელმწიფოს დააკისრა საქმის გამოძიება და მოლაშვილისთვის, მორალური კომპენსაციის სახით, 20 ათასი ევროს გადახდა.

სულხან მოლაშვილი 2016 წლის 29 ივნისს, 47 წლის ასაკში გარდაიცვალა.