შალვა პაპუაშვილი: ქართული ენის მიმართ დამოკიდებულება ჯერ კიდევ ილია ჭავჭავაძემ გამოხატა, როდესაც ტრიადაში - „მამული, ენა, სარწმუნოება“ მთავარ ქვაკუთხედად გამოკვეთა ჩვენი ეროვნული იდენტობისთვის

ქართული ენის მიმართ დამოკიდებულება ჯერ კიდევ ილია ჭავჭავაძემ გამოხატა, როდესაც ტრიადაში - „მამული, ენა, სარწმუნოება“ მთავარ ქვაკუთხედად გამოკვეთა ჩვენი ეროვნული იდენტობისთვის, - განუცხადა ჟურნალისტებს პარლამენტის თავმჯდომარე შალვა პაპუაშვილმა.

მისი თქმით, ამიტომ, რა თქმა უნდა, ენა, დედა ენა, ქართული ენა არის ჩვენი იდენტობის მთავარი განმსაზღვრელი.

„სწორედ ამიტომაც იყო, რომ 1978 წელს ჩვენი მოსახლეობა შეეწინააღმდეგა ზუსტად ჩვენი იდენტობის წინააღმდეგ წასვლას და ამით შეინარჩუნა ქართული ენა, როგორც სახელმწიფო ენა. დღესაც ისეთივე გამოწვევებია, როდესაც ჩვენს იდენტობას ებრძვიან, როდესაც უცხო იდეოლოგიებს გვახვევენ თავს, როდესაც ენაშიც გვერევიან, ტერმინოლოგიაში გვერევიან და სქესის სწორი დასახელების უფლებასაც არ გვაძლევდნენ ცოტა ხნის წინ, სანამ ამერიკაში არ შეიცვალა ხელისუფლება. აღმოჩნდა, რომ თურმე შეიძლება, ერთ დღეში ყველაფერი დაუბრუნდეს საღ აზრს. ერევიან ჩვენს ამ ტრიადაში, ყველაფერში ერევიან. ერევიან როგორც ენაში, სარწმუნოებაში, ჩვენი მამულის განცდაში და დღესაც ამიტომ არის მნიშვნელოვანი, რომ საზოგადოება კონსოლიდირებული იყოს თავისი მთავარი ღირებულებების დაცვის საქმეში. მათ შორის, ქართული ენის დაცვის საქმეში, რომელიც ჩვენი ერთ-ერთი მთავარი ეროვნული იდენტობის განმსაზღვრელია“, - აღნიშნა შალვა პაპუაშვილმა.

14 აპრილი ქართული ენის დღეა.