"თუ ასე გააგრძელებთ, ქართველი ხალხი აიყვანს მძევლად ბიძინა ივანიშვილს" - ლევან ხაბეიშვილი

"თუ ასე გააგრძელებთ, ქართველი ხალხი აიყვანს მძევლად ბიძინა ივანიშვილს", - ამის შესახებ რუსთავის ციხესთან მიმდინარე მიხეილ სააკაშვილის მხარდამჭერ აქციაზე, "ნაციონალური მოძრაობის" წევრმა ლევან ხაბეიშვილმა განაცხადა.

"ვპირდები ღარიბაშვილს და ივანიშვილს, ხვალ შევიკრიბებით ათიათასობით ადამიანი და მოვითხოვთ, საქართველოს მესამე პრეზიდენტის მიხეილ სააკაშვილის გათავისუფლებას.

მინდა ტელეეკრანებიდან გავაფრთხილო ყოველგვარი სუსის და მოსმენების გარეშე, მივმართავ ღარიბაშვილსაც, სუსის ხელმძღვანელსაც და ბიძინა ივანიშვილსაც:

თქვენ ტყვედ გყავთ მიშა სააკაშვილი, თუ ასე გააგრძელებთ, ქართველი ხალხი აიყვანს მძევლად ბიძინა ივანიშვილს და ეს იქნება ასე. ეს ბრძოლა იქნება უკომპრომისო. დღეის შემდეგ იცოდეს ყველამ, მშვიდად ვერ გადაადგილდება ვერც ღარიბაშვილი, ვერც კობახიძე, ვერც სალომე ზურაბიშვილი და ოლიგარქი ბიძინა ივანიშვილი. როგორ არ მინდა გარბოდეთ და ქართველი ხალხი მოგსდევდეთ.

ეს ბრძოლა დამთავრდება ქართველი ხალხის გამარჯვებით, მიშა გამხნევდი, მთავარსარდალო", - მიმართა ციხესთან შეკრებილ ადამიანებს ლევან ხაბეიშვილმა.

რუსთავის მე-12 პენიტენციურ დაწესებულებასთან, სადაც საქართველოს მესამე პრეზიდენტი მიხეილ სააკაშვილია მოთავსებული, ყოფილი პრეზიდენტის მხარდამჭერი საპროტესტო აქცია მიმდინარეობს. "თავისუფლება მიშას", - ეს არის აქციის მთავარი სლოგანი, რომელიც ბათუმში მიმდინარე ოპოზიციის საპროტესტო აქციის, პარალელურად დაიწყო. როგორც "ნაციონალური მოძრაობის" ლიდერები აცხადებენ, აქციები იქნება პერმანენტული, რომელიც სხვადასხვა ქალაქში გაიმართება.

ამავე თემაზე:

🔵 "გადავდივართ ბრძოლის ახალ ეტაპზე" - რუსთავის ციხესთან სააკაშვილის მხარდამჭერი აქცია იმართება

🔵  "წინ პოსტსაარჩევნო რევოლუცია გვაქვს" - მიხეილ სააკაშვილის გზავნილი საზოგადოებას