"გპირდებით პირველ ხილს და წვენს მე შემოგაწვდით "პერედაჩაზე"- კარმა უზენაესი სასამართლოა ჩვენნაირი მოკვდავებისთვის ბატონო სოსო" - დეა აფციაური

ეკონომიკის ექსპერტ ოთო აბესაძის მეუღლე დეა აფციაური, სუსის ყოფილი მაღალჩინოსნის სოსო გოგაშვილის დაკავებას ეხმაურება, რომლის თანამდებობაზე ყოფნის პერიოდში, ქრთამის აღების ფაქტზე ოთო აბესაძე დააკავეს, რომელიც იმჟამად, თბილისის მერიის თანამშრომელი იყო.

"ბატონო სოსო, ყველაზე სამწუხაროა თქვენნაირი მშობლების გამო შვილები, რომ იჩაგრებიან, მაგრამ ამ ყველაფერში მხოლოდ და მხოლოდ თქვენ ხართ დამნაშავე.

თუმცა თქვენი არასამართლიანი ქმედების გამო 2017 წელს მშობლებიან-შვილებიანად შეიწირეთ მთელი ჩვენი ოჯახის ჯანმრთელობა, რომელსაც დღემდე ვმკურნალობთ.

თქვენი არასამართლიანი ქმედების გამო აღმოჩნდა ჩემი ქმარი ციხეში,

თქვენი არასამართლიანი ქმედების გამო გარდაეცვალა ბაბუა,

თქვეენი არასამართლიანი ქმედების გამო დამიზიანდა ფიზიკურ-მენტალური ჯანმრთელობა და გაგვიმწარდა ცხოვრების ყველაზე მნიშვნელოვანი პერიოდი.

თქვენი არასამართლიანი ქმედების გამო თეთრი კაბის მაგივრად, გლდანის ციხის კედლებში მოვაწერე საყვარელ ადამიანთან ხელი,

თქვენი არასამართლიანი ქმედების გამო დავდიოდი ყოველდღე “პერედაჩებზე” ისე, რომ არ ვიცოდი კიდე 1თვე, 1 წელი თუ 10 წელი მომიწევდა გლდანის ციხეში სიარული.

საბოლოოდ ზოგიერთი ადამიანი ტოვებს იმ ადგილს, სადაც უსამართლოდ ხვდება და სხვები იკავებენ იგივე ადგილს სამართლიანად…

გპირდებით პირველ ხილს და წვენს მე შემოგაწვდით “პერედაჩაზე”

❗️კარმა უზენაესი სასამართლოა ჩვენნაირი მოკვდავებისთვის ბატონო სოსო ",- წერს დეა აფციაური.

სახელმწიფო უსაფრთხოების სამსახურის უფროსის ყოფილი მოადგილე, სოსო გოგაშვილი სპეცოპერაციის შედეგად საკუთარ სახლში გვიან ღამით აიყვანეს.

ცნობისთვის, სოსო გოგაშვილმა გუშინ დაწერა, რომ არჩევნების გაყალბების მტკიცებულებები ჰქონდა, რომელიც "შესაბამის ორგანიზაციას" გადასცა. რამდენიმე დღის წინ კი გია გაჩეჩილაძემ (უცნობი) აუდიოჩანაწერი გაავრცელა, რომელიც მთავარი არხის ჟურნალისტების ფარული მიყურადებით იყო მოპოვებული. აღნიშნულ აუდიოჩანაწერში საუბარი იყო სოსო გოგაშვილზეც.

სოსო გოგაშვილმა ქართული ოცნება 2020 წლის ოქტომბერში დატოვა. ის სახელმწიფო უსაფრთხოების სამსახურის უფროსის მოადგილედ 2015-2018 წლებში მუშაობდა. 2014 წელს შსს-ს გენინსპექციის უფროსი იყო. გოგაშვილი ხელმძღვანელობდა პანკისის ხეობაში ჩატარებულ სპეცოპერაციას, რა დროსაც 19 წლის თემირლან მაჩალიკაშვილი მოკლეს.

ასევე დაგაინტერესებთ: 

📍"გოგაშვილი ერთ-ერთი საცოდავი ჭანჭიკია მთელ ამ სურათში. ეს მოუწევთ ბოლოს უკანონო ბრძანებების შემსრულებლებს, ეს მაინც კარგად დაიმახსოვრეთ"