ისტორიული მსოფლიოს ჩემპიონატი ქართული ძიუდოსთვის

ყატარის დედაქალაქ დოჰაში დასრულდა მსოფლიოს ინდივიდიუალური ჩემპიონატი ძიუდოში, რომელიც ქართული ძიუდოსთვის ისტორიული გამოდგა.

საქართველოს ნაკრების წევრებმა შეძლეს 2 ოქროს, 1 ვერცხლის და 1 ბრინჯაოს მედლის მოპოვება და ისტორიაში პირველად ვაჟთა გუნდურ ჩათვლაში პირველი ადგილი დაიკავეს.

ჩემპიონები გახდნენ: ტატო გრიგალაშვილი(81კგ) და ლუკა მაისურაძე(90კგ), ვერცხლის მედალი მოიპოვა ლაშა ბექაურმა(90კგ), ხოლო ბრინჯაო დებიუტანტმა გიორგი სარდალაშვილმა(60კგ).

ისტორიაში პირველად ერთ მსოფლიოს ჩემპიონატზე 2 მსოფლიოს ჩემპიონი პირველად გვყავს და პირველად შედგა ქართული ფინალიც 90კგ წონით კატეგორიაში ლუკა მაისურაძესა და ლაშა ბექაურს შორის, ასევე ტატო გრიგალაშვილი გახდა პირველი 2-გზის მსოფლიოს ჩემპიონი.

დღეს გუნდური პირველობა გაიმართება და საქართველოს ნაკრების მეტოქე პირველ ეტაპზე მონღოლეთის ნაკრები იქნება.

ოლიმპიურმა ჩემპიონმა ლაშა ბექაურმა სოციალურ ქსელში ვრცელი წერილი გამოაქვეყნა, რომელიც მსოფლიოს ჩემპიონატზე მის გამოსვლას ეხებოდა, სადაც მან ვერცხლის მედალი მოიპოვა:

„მე იმ 300 არაგველის შთამომავალი ვარ! საქართველოს შვილი, იმ გმირი წინაპრების სისხლი ჩემშია ვგრძნობ, ვგრძნობ, რომ საქართველო ჩემშია და ყოველ წამს ბედნიერი ვარ იმით, რომ ქართველად დავიბადე, ამისთვის უდიდესი მადლობა უფალს! უდიდესი მადლობა ქართველ ხალხს, უდიდესი მადლობა ჩემს გულწრფელ გულშემატკივარს, მსოფლიო ჩემპიონატზე გამარჯვებაც და დამარცხებაც ყველაფერი ეს ღმერთის ნება იყო. მადლობა ღმერთს, იყო ქართული ფინალი და მადლობა ღმერთს, რომ დღე ქართული ჰიმნით დასრულდა. ძლიერი მაშინ ვიქნები, თუ უფრო ძლიერი ვიქნები ხვალ! და შევძლებ მივიღო მარცხი ისე ვაჟკაცურად, როგორც გამარჯვება, ქართველობა რთულია და მიხარია თუ ჩემი საქმით შემიძლია ვიქართველო, შემიძლია სიხარულის ცრემლებით გატიროთ და სახეზე თუნდაც რამდენიმე წამით ღიმილი მოგანიჭოთ. მიყვარხართ! მიყვარხართ! მიყვარხართ! ვიომებ იქ, სადაც ჩემს სამშობლოს დავჭირდები და კიდევ ერთხელ მიყვარხართ! მადლობა უფალს იმისთვის, რომ მომცა ის, რითაც შემიძლია ჩემი სამშობლო ვაამაყო და ჩემებმა იცოდნენ, რომ მათ ჰყავთ ლაშა ბექაური, პატარა და "ყველაზე დიდი ქვეყნიდან", რომელიც მსოფლიოს აზანზარებს“