ლუკა მაისურაძე მსოფლიო ჩემპიონია!

ყატარის დედაქალაქ დოჰაში მიმდინარე მსოფლიო ჩემპიონატზე ძიუდოში დღეს ჩემპიონ-პრიზიორები -90კგ წონით კატეგორიაში გამოვლინდნენ.

წონას ორი გამოკვეთილი ფავორიტი ჰყავდა და ორივე ქართველი: ოლიმპიური ჩემპიონი ლაშა ბექაური და ევროპის ჩემპიონი ლუკა მაისურაძე.

მათ სრულად გაამართლეს ფავორიტის სტატუსი და ერთმანეთს ფინალში დაუპირისპირდნენ. ლაშა ბექაურმა პირველ წრეში ტაჯიკი კომრონშოხ უსტოპირიონი იპონით დაამარცხა, მეორე ეტაპზე სერბ ნემანია მაიდოვს ვაზარის უპირატესობით მოუგო, მეოთხედფინალში ორი ვაზარი აართვა ნეიტრალური სტატუსით მოასპარეზე რუს მანსურ ლორსანოვს, ნახევარფინალში კი იაპონელი სანშირო მურაო ასევე ორი ვაზარით დაამარცხა. ლუკა მაისურაძემ პირველ წრეში უნგრელი როლანდ გოზი ორი ვაზარით, მეორე წრეში თურქეთის სახელით მოასპარეზე მიხაილ ზგანკი იპონით დაამარცხა,  მეოთხედფინალში ნიდერლანდელს ნოელ ვან ტენდს სამი გაფრთხილება მიაღებინა, ნახევარფინალში კი იტალიელი კრიასტიან პარლატი ერთი ვაზარით ჩამოიშორა.

ფინალი ჩვენი ნაკრების ორ ლიდერს შორის დაძაბულად წარიმართა და ლუკა მაისურაძემ შეძლო ოლიმპიური ჩემპიონი ლაშა ბექაურის ვაზარის უპირატესობით დამარცხება და გახდა მსოფლიო ჩემპიონი.

შეგახსენებთ, რომ გუშინ ასევე მსოფლიოს ტრიუმფატორი გახდა ტატო გრიგალაშვილი -81კგ წონით კატეგორიაში,  ხოლო მანამდე დებიუტანტმა გიორგი სარდალაშვილმა -60კგ კატეგორიაში ბრინჯაოს მედალი მოიპოვა.

ხვალ ტატამზე ვიხილავთ -100 კგ კატეგორიაში ნაკრების კაპიტან ვარლამ ლიპარტელიანსა და ილია სულამანიძეს.