ბელგიის ქალაქების მერები ევროპის მასშტაბით ფოიერვერკების გაყიდვაზე აკრძალვის შემოღებას ითხოვენ

ახალი წლის ღამეს ფოიერვერკების გამოყენების შედეგად მიღებული ტრავმების სერიის შემდეგ, ბელგიაში კერძო პირებისთვის ფოიერვერკების მიყიდვაზე აკრძალვის შემოღებას განიხილავენ. როგორც Politico წერს, აზრთა სხვადასხვაობაა იმასთან დაკავშირებით, საკმარისი იქნება ეროვნულ დონეზე აკრძალვა, თუ მისი გაფართოება ევროპის მასშტაბით გაყიდვებზე იქნება საჭირო.

როგორც გამოცემა აღნიშნავს, ბელგიის ქალაქების მერები ფეიერვერკების გაყიდვაზე ემბარგოს მთელი ევროპის მასშტაბით ითხოვენ, თუმცა, ცხოველების უფლებათა დაცვითი ორგანიზაციები მიიჩნევენ, რომ აკრძალვა ჯერ ქვეყნის შიგნით უნდა ამოქმედდეს.

აღსანიშნავია, რომ ბელგიის რამდენიმე მუნიციპალიტეტმა ფეიერვერკების გაყიდვაზე აკრძალვა ადგილობრივ დონეზე უკვე შემოიღო, თუმცა ფლამანდიის ქალაქებისა და მუნიციპალიტეტების ასოციაციის განცხადებით, ფლამანდიის რეგიონის ხუთი მერიდან ოთხს, საერთო ეროვნული აკრძალვის შემოღება სურს.

„ჩვენ ვხედავთ, რომ წლიდან წლამდე, დაზარალებულთა რაოდენობა იზრდება. ადამიანები კიდურებს იზიანებენ, ზოგი ადამიანი კი, ფოიერვერკს საგანგებო სამსახურების თანამშრომლებსა და პოლიციელებზე თავდასხმებისთვის იყენებს. ეს პრობლემა, ბოლო პერიოდში განსაკუთრებით გამწვავდა“, - მოჰყავს გამოცემას უფლებადაცვითი ორგანიზაციის წარმომადგენლის, ნატალი დებასტის სიტყვები.

როგორც არასამთავრობო ორგანიზაცია VVSG-ში აცხადებენ, აკრძალვა ევროკავშირის ყველა ქვეყანაში უნდა გავრცელდეს, რათა ხალხმა კანონს გვერდი არ აუაროს საზღვრის გადაკვეთითა და ფოიერვერკის სხვა ქვეყანაში შეძენით.