ბენიამინ ნეთანიაჰუმ ისრაელის პრეზიდენტის შეწყალების თხოვნით მიმართა

ისრაელის პრემიერ-მინისტრმა ბენიამინ ნეთანიაჰუმ ქვეყნის პრეზიდენტს, იცხაკ ჰერცოგს შეწყალების თხოვნით ოფიციალურად მიმართა.

პრეზიდენტის ოფისის მიერ გავრცელებულ განცხადებაში აღნიშნულია, რომ თხოვნა იუსტიციის სამინისტროს შესაბამის დეპარტამენტს გადაეცა, რომელიც ქვეყნის მეთაურისთვის „ყველა შესაბამისი ორგანოს“ მოსაზრებას შეკრებს. ყველა საბუთის მიღების შემდეგ პრეზიდენტი „პასუხისმგებლობიანად და კეთილსინდისიერად განიხილავს თხოვნას“.

სოციალურ ქსელებში გამოქვეყნებულ ვიდეომიმართვაში ნეთანიაჰუმ განაცხადა, რომ პროცესი მის წინააღმდეგ უკვე თითქმის 6 წელია მიმდინარეობს, მაგრამ გამოძიების დაწყების შემდეგ „პრაქტიკულად არაფერი მომხდარა“. მისივე თქმით, ისრაელი „უზარმაზარი გამოწვევების წინაშე დგას“ და საფრთხის თავიდან ასაცილებლად ეროვნული ერთიანობაა საჭირო, მის წინააღმდეგ სასამართლო პროცესის გაგრძელება კი საზოგადოებას შიგნიდან ხლეჩს.

„დარწმუნებული ვარ, ისევე როგორც ბევრი ამ ქვეყანაში, რომ პროცესის დაუყოვნებლივი შეწყვეტა ხელს შეუწყობს დაძაბულობის შემცირებას და ფართო შერიგებას - იმას, რაც ჩვენს ქვეყანას ასე სჭირდება“, - განაცხადა ნეთანიაჰუმ.

The Times of Israel-ი აღნიშნავს, რომ თავის მიმართვაში ნეთანიაჰუ ბრალს არ აღიარებს და არც ბოდიშს იხდის.

ნეთანიაჰუს ქრთამის აღებაში, თაღლითობასა და ნდობით ბოროტად სარგებლობაში ადანაშაულებენ. სასამართლო პროცესი 2020 წლიდან მიმდინარეობს.