ისრაელის თავდაცვის ძალებმა დაადასტურეს, რომ ავიაიერიშის შედეგად ირანის რევოლუციური გვარდიის საჰაერო ძალების მეთაური და უმაღლესი თანამდებობის პირები დაიღუპნენ

ისრაელის თავდაცვის ძალების ცნობით, ირანის ბირთვულ ობიექტებზე ისრაელის საჰაერო იერიშის შედეგად ისლამური რევოლუციის გვარდიის კორპუსის საჰაერო ძალების მეთაური, ბრიგადის გენერალი ამირ ალი ჰაჯიზადეჰი დაიღუპა.

სამხედროების ცნობით, ირანის რევოლუციური გვარდიის საჰაერო ძალების უმაღლესი თანამდებობის პირები მასთან ერთად დაიღუპნენ, როდესაც ისინი მიწისქვეშა სამეთაურო ცენტრში შეიკრიბნენ ისრაელზე თავდასხმისთვის მოსამზადებლად.

ისრაელის თავდაცვის ძალების ცნობით, სამეთაურო ცენტრს ავიაგამანადგურებლებით შეუტიეს.

სამხედროების ცნობით, დაღუპულ მაღალჩინოსნებს შორის იყვნენ ირანის რევოლუციური გვარდიის დრონებისა და საჰაერო თავდაცვის ქვედანაყოფების მეთაურები.

აღნიშნულია, რომ ირანის მიერ ისრაელზე გასული წლის აპრილსა და ოქტომბერში ბალისტიკური რაკეტებითა და დრონებით განხორციელებულ იერიშებზე პასუხისმგებლები სწორედ ირანის რევოლუციური გვარდიის საჰაერო ძალები იყვნენ.

ისრაელის თავდაცვის ძალების ცნობითვე, ოფიციალური პირები ასევე ხელმძღვანელობდნენ 2019 წელს საუდის არაბეთში ნავთობის ობიექტებზე დრონებით თავდასხმას.

„ჰაჯიზადეჰმა ბოლო წლებში არაერთხელ საჯაროდ აღუთქვა ერთგულება ისრაელის განადგურების იდეას და ცენტრალური როლი ითამაშა ისრაელის განადგურების გეგმის შემუშავებაში“, - აცხადებენ ისრაელის თავდაცვის ძალებში.

ცნობისთვის, 13 ივნისს, გამთენიისას ისრაელმა ირანის წინააღმდეგ სამხედრო ოპერაცია სახელწოდებით „ლომთა ერი“ დაიწყო. ისრაელმა ირანის ბირთვული ობიექტები დაბომბა.

პასუხად ირანმა ისრაელის მიმართულებით 100-მდე დრონი გაუშვა. ისრაელის მედიის ცნობით, ყველა ირანული დრონი განადგურებულია.