„მხოლოდ არამზადას შეუძლია ასე მოქცევა, საჭიროა ძლიერი პასუხი მსოფლიოსგან“ - ზელენსკი სუმიზე რუსეთის სარაკეტო იერიშზე

უკრაინის პრეზიდენტი ვოლოდიმირ ზელენსკი 13 აპრილის დილას ქალაქ სუმიზე რუსეთის სარაკეტო იერიშს გამოეხმაურა და განაცხადა, რომ წინასწარი მონაცემებით, ათობით მშვიდობიანი მოქალაქე დაიღუპა და დაიჭრა.

„მტრის რაკეტები მოხვდა ჩვეულებრივი ქალაქის ქუჩას, ჩვეულებრივ ცხოვრებას: სახლებს, საგანმანათლებლო დაწესებულებებს, მანქანებს ქუჩაში და ეს იმ დღეს, როდესაც ხალხი ეკლესიაში მიდის: ბზობის კვირას, უფლის იერუსალიმში შესვლის დღესასწაულზე“, - აღნიშნა მან.

ზელენსკის თქმით, მხოლოდ არამზადას შეუძლია ასე მოქცევა.

„ჩვეულებრივი ადამიანებისთვის სიცოცხლის წართმევა. ვუსამძიმრებ მათ ოჯახებსა და ახლობლებს. სამაშველო ოპერაცია მიმდინარეობს. ყველა საჭირო სერვისი მუშაობს“, - დასძინა უკრაინის პრეზიდენტმა.

ზელენსკიმ კიდევ ერთხელ ხაზგასმით აღნიშნა, რომ რუსეთი ომს აჭიანურებს.

„ჩვენ გვჭირდება ძლიერი პასუხი მსოფლიოსგან - შეერთებული შტატებისგან, ევროპისგან, მსოფლიოში ყველასგან, ვისაც სურს, ეს ომი და მკვლელობა დასრულდეს. რუსეთს სწორედ ასეთი ტერორი სურს და ამ ომს აჭიანურებს. აგრესორზე ზეწოლის გარეშე მშვიდობა შეუძლებელია. ბალისტიკა და საჰაერო ბომბები მოლაპარაკებებს არასოდეს შეუჩერებია. ჩვენ გვჭირდება რუსეთის მიმართ ისეთი დამოკიდებულება, როგორსაც ტერორისტი იმსახურებს“, - აღნიშნა ვოლოდიმირ ზელენსკიმ.