ბათუმის სპორტის სასახლეში კურაშის ევროპის ჩემპიონატი მიმდინარეობს

ბათუმის სპორტის სასახლეში კურაშის ევროპის ჩემპიონატი მიმდინარეობს.

ჩემპიონატში მონაწილეობას იღებს 20 ქვეყნის 212 ათლეტი, საქართველოს ღირსებას კი 59 სპორტსმენი იცავს. ტურნირის პირველ საშეჯიბრო დღეს საქართველოს ნაკრებმა 11 ოქროს, 5 ვერცხლისა და 12 ბრინჯაოს მედალი
მოიპოვა.

აღსანიშნავია, რომ საქართველო პირველად მასპინძლობს კურაშის ევროპის ჩემპიონატს, რომელიც 9-14 აპრილის ჩათვლით ბათუმში იმართება. ჩემპიონატის ფარგლებში საერთაშორისო კურაშის ინსტიტუტმა უკვე ჩაატარა სემინარები ევროპის ქვეყნების კურაშის მწვრთნელებისა და მსაჯების პროფესიული განვითარების მიზნით.

გახსნის ოფიციალურ ღონისძიებაში მონაწილეობა მიიღო აჭარის განათლებისა და სპორტის მინისტრმა, მაია ხაჯიშვილმა, საქართველოს სპორტის მინისტრ შალვა გოგოლაძესთან, უზბეკეთის სპორტის მინისტრ ადჰამ იკრამოვთან, აჭარის კულტურის მინისტრ ელისო ბოლქვაძესა და ბათუმის მერთან არჩილ ჩიქოვანთან ერთად.

მინისტრმა მადლობა გადაუხადა საქართველოს სპორტის მინისტრს მასპინძელ ქალაქად ბათუმის შერჩევისა და ღონისძიების მხარდაჭერისთვის.

ჩემპიონატი საქართველოს სპორტის სამინისტროს ფინანსური მხარდაჭერითა და საქართველოს ეროვნული ფედერაცია „სპორტი ყველასათვის“ ორგანიზებით მიმდინარეობს. მხარდამჭერები არიან აჭარის განათლებისა და სპორტის სამინისტრო, აჭარის კულტურის სამინისტრო და ქ. ბათუმის მერია.