ნეთანიაჰუ აცხადებს, რომ ისრაელი ირანთან ორმხრივი ცეცხლის შეწყვეტის შესახებ აშშ-ის წინადადებას დათანხმდა

ისრაელი ადასტურებს, რომ დაეთანხმა აშშ-ის წინადადებას ირანთან ორმხრივი ცეცხლის შეწყვეტის შესახებ, თუმცა „ძლიერად უპასუხებს“ ზავის ნებისმიერ დარღვევას. ამის შესახებ ისრაელის პრემიერ-მინისტრის ბენიამინ ნეთანიაჰუს ადმინისტრაციის განცხადებაშია ნათქვამი.

როგორც განცხადებაშია აღნიშნული, პრემიერ-მინისტრი შეხვდა კაბინეტს, თავდაცვის მინისტრს, ისრაელის თავდაცვის ძალების შტაბის უფროსს და „მოსადის“ ხელმძღვანელს, რათა „მოეხსენებინა, რომ ისრაელმა მიაღწია ოპერაცია „აღმავალი ლომის“ ყველა მიზანს და ბევრ სხვას“.

„ისრაელმა ორმაგი, უშუალო საფრთხე მოხსნა - როგორც ბირთვული, ასევე ბალისტიკური რაკეტების სფეროებში“, - ნათქვამია განცხადებაში.

განცხადების თანახმად, „ისრაელის თავდაცვის ძალებმა თეირანის ცაზე სრული საჰაერო კონტროლი დაამყარა, სამხედრო ხელმძღვანელობას სერიოზული ზიანი მიაყენა და ირანის ათობით ცენტრალური სამთავრობო სამიზნე გაანადგურა“.

განცხადებაში ასევე პირველად გაჟღერდა, რომ კიდევ ერთი წამყვანი ბირთვული მეცნიერი დაიღუპა.

„ბოლო დღის განმავლობაშიც კი ისრაელის თავდაცვის ძალებმა თეირანის ცენტრში რეჟიმის სამიზნეებს მნიშვნელოვანი დარტყმები მიაყენეს, გაანადგურეს რეჟიმის ჩაგვრის აპარატის, „ბასიჯის“ ასობით აგენტი და მოკლეს კიდევ ერთი წამყვანი ბირთვული მეცნიერი“, - ნათქვამია განცხადებაში.

„ისრაელი მადლობას უხდის პრეზიდენტ ტრამპს და შეერთებულ შტატებს თავდაცვის სფეროში მხარდაჭერისა და ირანის ბირთვული საფრთხის აღმოფხვრაში მონაწილეობისთვის“, - ნათქვამია განცხადებაში.

„ოპერაციის მიზნების მიღწევისა და პრეზიდენტ ტრამპთან სრული კოორდინაციით, ისრაელი დათანხმდა პრეზიდენტის წინადადებას ორმხრივი ცეცხლის შეწყვეტის შესახებ“, - აცხადებს პრემიერ-მინისტრი და დასძენს, რომ ისრაელი „ძლიერად უპასუხებს ცეცხლის შეწყვეტის ნებისმიერ დარღვევას“.