5 ივლისის საქმეზე დაკავებულ 6 მოძალადეს ერთწლიანი, ხოლო ერთს წელიწადნახევრიანი პატიმრობა მიესაჯათ

2021 წლის 5 ივლისს ჟურნალისტებზე მასობრივი ძალადობის საქმეზე დაკავებულ 7 კაცს პატიმრობა მიესაჯა. მათ მხოლოდ რამდენიმე თვე მოუწევთ პატიმრობაში ყოფნა, რადგან სასჯელის დიდი ნაწილი აღკვეთის ღონისძიებად გამოყენებულმა პატიმრობამ გამოაკლო. გადაწყვეტილება თბილისის საქალაქო სასამართლოს მოსამართლემ ვალერიან ბუგიანიშვილმა მიიღო.

როგორც ამავე საქმის განმხილველმა სხვა მოსამართლეებმა ბრალდებულების ნაწილს ბრალი შეცვალა და ძალადობის ორგანიზების მუხლი ძალადობაში გადაუკვალიფიცირა. მათ ბრალად ედებოდათ "TV პირველისა" და "ინტერპრესნიუსის" ჟურნალისტებზე ძალადობა.

ირაკლი წიგნაძე - 1 წლის ვადით;
ბაქარ მაისურაძე - 1 წელი;
ნიკოლოზ დადვანი - 1 წელი;
მუხრან დადვანი - 1 წელი;
თორნიკე გაბელიანი - 1 წელი;
ვანო ბურდული - 1 წელი და 6 თვე;
დავით ქოჩიაშვილი - 1 წელი.

არცერთი მათგანი, ისევე, როგორც 5 ივლისის საქმის სხვადასხვა ეპიზოდზე დაკავებული პირები, დანაშაულს არ აღიარებს. ისინი აცხადებენ, რომ არავისზე უძალადიათ.

5 ივლისს ჟურნალისტებზე მასობრივი ძალადობის საქმეზე 27 კაცი დააკავეს. ამ დღეს 50-ზე მეტი ჟურნალისტი დაშავდა. ძალადობის ორგანიზების ბრალდებით ამ დრომდე არავინ არ დაუკავებიათ.

რუსთაველის გამზირზე, მედიასაშუალებების წარმომადგენელთა მიმართ განხორციელებულ ძალადობრივ ქმედებებსა და პროფესიულ საქმიანობაში ხელის შეშლის ბრალდებით დაკავებულ 27 პირს ბრალი სისხლის სამართლის კოდექსის 154-ე (ჟურნალისტისთვის პროფესიულ საქმიანობაში უკანონოდ ხელის შეშლა), 156-ე (დევნა), 225-ეს მე-2 ნაწილი (ორგანიზებულ ჯგუფურ ძალადობაში მონაწილეობა) მუხლებით ჰქონდა წაყენებული. ნაწილს კი ბრალი წარედგინა სისხლის სამართლის კოდექსის 118 მუხლის მე-3 ნაწილით, რაც გულისხმობს ჯანმრთელობის განზრახ ნაკლებად მძიმე დაზიანებას.

2021 წლის 5 ივლისს ძალადობრივი ჯგუფების წევრების მიერ ნაცემი ლექსო ლაშქარავა 11 ივლისს საკუთარ სახლში გარდაცვლილი იპოვეს.

ასევე დაგაინტერე­­­­სებთ:

🔵 მოემზადეთ ივნის/ივლისის კოვიდ აფეთქებისთვის, ორი ახალი კოვიდ ვარიანტი წამოვიდა ერთდროულად აზიიდან და ევროპიდან - გიორგი ფხაკაძე

🔵 ველოდებით ოფიციალურ მტკიცებულებებს და დამაჯერებელ არგუმენტებს საქართველოდან - კულება უკრაინული სამხედრო დაზვერვის ინფორმაციაზე