ბორჯომელი პატიმარი ციხის თანამშრომლებს კუთვნილი ბარათის ჩამორთმევასა და თანხის დახარჯვაში ადანაშაულებს

ბორჯომში დამამძიმებელ გარემოებაში მეუღლის განზრახ მკვლელობის მცდელობის და ოჯახური ძალადობის ბრალდებით დაკავებული გ.კ-ს საქმეზე ექვსი მოწმე დაიკითხა. სასამართლო სხდომის დაწყებამდე ბრალდებულმა ადვოკატებს განუცხადა, რომ ციხის თანამშრომლებმა მისი კუთვნილი კარტიდან თანხა დაუხარჯეს და ამ დრომდე არ უბრუნებენ – არც თანხას და არც ბარათს.

ინფორმაციას "სამხრეთის კარიბჭე" ავრცელებს.

„მე-10 დღეა ჩემი კარტა წაღებული აქვთ, 160 ლარი შეცდომით შეეშალათ და ერთი ბლოკი სიგარეტი იყიდეს. არც არაფერს მეუბნებიან, მეღადავებიან, თავიანთი ჭკუით. ამ საქმეში ყველა ჩართულია ციხის წარმომადგენელიც და პატიმრებიც. ფული წაღებული აქვთ და ვერც საჭმელს ვყიდულობ და ვერაფერს, რომ იცოდეთ ისე არც სიკვდილს ვაპირებ და არც თავის მოკვლას, სრულიად ჯანმრთელი ვარ, თუ რაიმე მომივიდა პასუხისმგებლობა მათზე იყოს“,- უთხრა პროცესის დაწყებამდე ადვოკატებს ბრალდებულმა.

ი.კ–მ იგივე პრობლემაზე მოსამართლესთანაც ისაუბრა.

ბრალდებულის ინტერესებს ადვოკატები, პაატა მანველიშვილი და იური ფატარიძე იცავენ.

გ.კ-ს სასამართლო პროცესზე ექსპერტ-კრიმინალისტები, დეტექტივ-გამომძიებლები და ის უბნის ინსპექტორები დაიკითხნენ, რომლებმაც შემთხვევის დღეს საგამოძიებო მოქმედებები ჩაატარეს და ბრალდებულის ოჯახის წევრები დაკითხეს.

„მე გამოვკითხე ვ.ა-ს ნათესავი და მეზობელი. როგორც მან აღნიშნა ის კონფლიქტის დროს სახლში იმყოფებოდა და ესმოდა ჩხუბის ხმა. მისი მონაყოლით, ბრალდებულმა ჯერ შვილი გამოუშვა სახლიდან, შემდეგ გაისმა ქალის განწირული ხმა, რომ შევიდა ვ.ა. (ბრალდებულის ცოლი) კარებთან იყო ჩაკეცილი“,- თქვა პროცესზე დეტექტივმა, დავით ბლიაძემ.

ასევე პროცესზე დაიკითხა ბორჯომის რაინული სამმართველოს დეტექტივის თანაშემწე გამომძიებელი, თეონა ივანიძეც. მისი თქმით, შემთხვევის ადგილზე მისვლის დროს, ეზოს კარის წინ გზის მხარეს დასაკეცი შავტარიანი დანა ნახა, რომელსაც მოწითალო ლაქები ჰქონდა.

ამავე პროცესზე პროკურორმა დასაშვებ მტკიცებულებად წარმოადგინა გამოძიების ეტაპზე გ.კ-ს ქიმიურ-ტოქსიკოლოგიური ექსპერტიზა, რომლის დასკვნაც 2022 წლის 15 აგვისტოს გახდა ცნობილი.

დასკვნის მიხედვით, გ.კ-ს სისხლის ნიმუშში, არ აღმოჩნდა ნარკოტიკული და ფსიქოტროპული ნივთიერებები.

აღნიშნული შუამდგომლობა უდავო გახადა დაცვის მხარემ, მოსამართლის გადაწყვეტილებით, საქმეს დაერთო როგორც უდავო მტკიცებულება.

შეგახსენებთ, რომ ბორჯომში მცხოვრებმა გ.კ-მ, მიმდინარე წლის 1-ელ მაისს ცოლს 16-მდე ჭრილობა მიაყენა. სამართალდამცველებმა ბრალდებული მომხდარიდან მალევე დააკავეს. პოლიციამ დანაშაულის ჩადენის იარაღი - დანა ნივთმტკიცებად ამოიღო.

ასევე დაგაინტერესებთ:

🔵როგორია დიღომში აფეთქების დროს დაშავებული დედა-შვილის მდგომარეობა

🔵დედამ ჩვილი ფეხსაცმლის ყუთით საავადმყოფოს კართან დატოვა - რა სასჯელი ელის?