ჭადრაკის სწავლება სკოლაში სავალდებულო იქნება

"ჭადრაკის სწავლება სკოლაში პირველ კლასში ახალი სასწავლო წლიდან, ანუ სექტემბრიდან სავალდებულო იქნება", - ამის შესახებ შესაბამის ბრძანებას განათლებისა და მეცნიერების მინისტრმა მიხეილ ჩხენკელმა, უკვე მოაწერა ხელი.

ბრძანების თანახმად პირველ კლასში ჭადრაკის სწავლება სავალდებულო იქნება იმ შემთხვევაში თუ სკოლას შესაბამისად მომზადებული პედაგოგი ეყოლება.

ინფორმაციას განათლების სამინისტრო ავრცელებს.

"ჭადრაკი აუმჯობესებს მოსწავლეთა მრავალმხრივ უნარებს, როგორებიცაა:

ყურადღება, კონცენტრირება, მეხსიერება, ანალიზი, ლოგიკა, გადაწყვეტილების მიღება, სივრცეში ორიენტირება და სხვა.

ეს კი, პირდაპირ კავშირშია მათემატიკისა და სხვა საგნების სტანდარტებით განსაზღვრულ კომპეტენციებთან", - ნათქვამია სამინისტროს განცხადებაში.

სკოლაში ჭადრაკის სწავლების დასანერგად სამინისტრო ჭადრაკის ეროვნულ ფედერაციასთან მოსამზადებელ სამუშაოებს აწარმოებს „ მასწავლებლების ტრენინგების ორგანიზებისა და სასწავლო რესურსების მომზადების კუთხით“.

განათლების სამინისტროს ცნობით, სკოლებში ჭადრაკის სწავლება გათვალისწინებულია ევროკავშირის 2012 წლის დეკლარაციით, რომელიც საგანმანათლებლო სისტემებში ჭადრაკის სწავლების დანერგვას ითვალისწინებს.

ამავე თემაზე:

* ნანა გეგეჭკორი: რომელ კვლევებს ეყრდნობა სკოლაში ჭადრაკის სწავლების გადაწყვეტილება და რომელი კვლევები ამბობენ რომ ჭადრაკი იწვევს აზროვნების განსაკუთრებული უნარების ჩამოყალიბებას?