ნანა გეგეჭკორი: რომელ კვლევებს ეყრდნობა სკოლაში ჭადრაკის სწავლების გადაწყვეტილება და რომელი კვლევები ამბობენ რომ ჭადრაკი იწვევს აზროვნების განსაკუთრებული უნარების ჩამოყალიბებას?

განათლების მინისტრის მიხეილ ჩხენკელის განცხადებით, სკოლაში ახალი სასწავლო წლიდან ჭადრაკის სწავლა სავალდებულო იქნება. აღნიშნულ გადაწყვეტილებას ამერიკაში მოღვაწე ქართველი ექიმი ნანა გეგეჭკორი  სოციალურ ქსელში ეხმაურება და წერს:

"რომელ კვლევებს ეყრდნობა სკოლაში ჭადრაკის სწავლების გადაწყვეტილება.

რომელი კვლევები ამბობენ რომ ჭადრაკი იწვევს აზროვნების განსაკუთრებული უნარების ჩამოყალიბებას?

ჭადრაკში მსოფლიო ჩემპიონები განსაკუთრებული გონებით რომ გამოირჩევიან, ეს ჭადრაკის თამაშით მიღებული შედეგი ალბათ ნაკლებადაა, უფრო ამ ადამიანების განსაკუთრებული გონებრივი შესაძლებლობები განაპირობებს მათ წარმატებას სპორტის ისეთ სახეობაში, რომელსაც ანალიტიკური უნარები სჭირდება.

მოხალისეები თუ გაართობენ სკოლებში ბავშვებს ჭადრაკით, გადასარევი იდეაა.

სხვაგვარად, ამაში თქვენი შემოსავლებიდან იხდით ფულს, იმ ქვეყანაში სადაც ბავშვების უმრავლესობის ყოველდღიური საკვები რაციონი არ არის ჯანმრთელი, ეკონომიკური სიდუხჭირის გამო.

ბავშვების უდიდესი ნაწილი არ იკვებება სრულფასოვნად, ცხოვრობს ტყვიით და კიდევ ათასი არასასურველი მინარევით დაბინძურებულ გარემოში, არ მიუწვდება ხელი პირველად ჯანდაცვაზე, რაც არის მთავარი განმაპირობებელი იმის, რომ გონებრივი განვითარება სწორად ვერ მიდის.

ამას ემატება, სკოლებში პერსონალის უკიდურესი არაკომპეტენტურობა, არა ემპათიურობა, სოციალური იერარქიებისგან შემდგარი საზოგადოება, რომელიც ქვედა ფენას და განახვავებულს უმოწყალოდ ჩაგრავს, სიძულვილის წარმოუდგენელი ნიაღვარი რეალურ თუ ვირტუალურ სივრცეში.

ეს ფაქტორები აფერხებენ ღარიბ საქართველოში ბავშვების სწორად განვითარებას და არა ჭადრაკის ნაკლებობა სკოლაში", - წერს ნანა გეგეჭკორი.

ასევე დაგაინტერესებთ:

* ოპტიმისტურად ვარ განწყობილი, რომ ეს ვითარება ძალიან მალე შეიცვლება მიხეილ სააკაშვილის, როგორც უსამართლოდ ტყვეობაში მყოფი ადამიანის სასარგებლოდ - ნიკა მელია

* რამდენად საშიში ინფექციაა „მაიმუნის ყვავილი“ და რას ამბობს ჯანმოს ევროპის ოფისი?