ჩხოროწყუს საკრებულოს თავმჯდომარე მოადგილის პოზიციას ქართული ოცნების წარმომადგენელს სთავაზობს

პარტია "საქართველოსთვის" წევრი შოთა წურწუმია მოადგილის პოზიციას ქართული ოცნების წარმომადგენელს სთავაზობს. ამის შესახებ წურწუმიამ საკრებულოს სხდომაზე განაცხადა.

ინფორმაციას პარტიის პრესსამსახური ავრცელებს.

მისი ინფორმაციით, ჩხოროწყუს საკრებულომ თავმჯდომარე და ორი მოადგილე უკვე აირჩია, ქართული ოცნების წარმომადგენელმა მესამე მოადგილის თანამდებობაზე უარი განაცხადა, თუმცა ბალანსის პრინციპის დაცვის მიზნით, ქართულ ოცნებას საკრებულომ დრო მისცა და სხდომა გადადო.

„მიუხედავად იმისა, რომ ელემენტარულია ეს ალბათ საკრებულოს წევრებისთვის, როდესაც თვითმმართველობის კოდექსი გვკარნახობს, რომ თავმჯდომარის მოადგილეებს უთითებს საკრებულოს თავმჯდომარე, ჩვენ შევთავაზეთ ქართული ოცნების წარმომადგენლებს, რომ სურვილის შემთხვევაში მიეღოთ მოადგილის კენჭისყრაში მონაწილეობა, რაზედაც მათ უარი განაცხადეს. ამ ეტაპისთვის ხედავთ, რომ არჩეულია თავმჯდომარე და 2 მოადგილე.

იმისთვის, რომ ბალანსი, რომელიც ჩვენ ერთგვარ ვალდებულებად დაგვაკისრა ჩვენმა საზოგადოებამ და ჩვენი პარტიული ხაზიც სწორედ ეს არის, რამდენიმე დღე დავიტოვოთ მომავალი კონსულტაციებისთვის, რომ ბალანსი იყოს დაცული, თქვენი ნებართვით ჩვენ გადავდებთ საკრებულოს სხდომას, კიდევ ერთხელ იმისთვის, რომ გვქონდეს კონსულტაცია როგორც ოპოზიციური პარტიის წარმომადგენელთან, ასევე ოცნების წარმომადგენლებთან დარჩენილია 1 მოადგილე, კომისიის თავმჯდომარეები და ჩვენი დიდი სურვილია, რომ ისინიც იყვნენ ჩართულნი ამ პროცესში და დაიკავონ ეს პოზიცია" - განაცხადა შოთა წურწუმიამ,

„საბოლოოდ დამტკიცდა „ნაციონალური მოძრაობისა“ და გახარიას პარტიის კოალიცია“, - ასე შეაფასა ჩხოროწყუს საკრებულოს თავმჯდომარედ ქვეყნის ყოფილი პრემიერ - მინისტრის გიორგი გახარიას თანაგუნდელის არჩევა, „ქართული ოცნების“ ცენტრალურ ოფისში გამართულ ბრიფინგზე სოზარ სუბარმა. 

სოზარ სუბარის თქმით, ამასთანავე, მომხდარი კიდევ ერთხელ ააშკარავებს ტყუილს, თითქოს გახარიას პარტია „ნაციონალურ მოძრაობასთან“ თანამშრომლობას და კოალიციას გამორიცხავდა. ეს იყო მტკნარი სიცრუე, რაც დღეს უკვე ყველასთვის აშკარა გახდა.

ცნობისთვის, გიორგი გახარიას პარტიის "საქართველოსთვის" წევრი, პოეტი შოთა წურწუმია ჩხოროწყუს საკრებულოს თავმჯდომარედ 23 დეკემბერს აირჩიეს.

შოთა წურწუმიას 14-მა დეპუტატმა დაუჭირა მხარი.

ასევე საინტერესოა:

🔵 დამტკიცდა „ნაციონალური მოძრაობისა“ და გახარიას პარტიის კოალიცია - სოზარ სუბარი

🔵 ავტოსაგზაო შემთხვევას ერთი ადამიანის სიცოცხლე ემსხვერპლა