"დავაკვირდებით და შემდგომ შეიძლება, გადაიხედოს" - ამირან გამყრელიძე "მწვანე სტატუსის" შესახებ დღეს მიღებულ გადაწყვეტილებაზე

"დაავადებათა კონტროლის ცენტრის პოზიცია იყო სხვა, საკოორდინაციო საბჭომ უმრავლესობით მიიღო ეს გადაწყვეტილება გარკვეული პერიოდით, დავაკვირდებით და შემდგომ შეიძლება, გადაიხედოს", - ასე გამოეხმაურა დაავადებათა კონტროლის ეროვნული ცენტრის ხელმძღვანელი ამირან გამყრელიძე "მწვანე პასპორტის" შესახებ დღეს მიღებულ საკოორდინაციო საბჭოს გადაწყვეტილებას.

გამყრელიძის განმარტებით, მწვანე პასპორტი მოიცავს ოთხ ინდიკატორს, ესენია: ორჯერადი აცრა, ინფექციის გადატანა, ბოლო 72 საათში ჩატარებული პისიარ ტესტი და ბოლო 24 საათში ჩატარებული ანტიგენის სწრაფი ტესტი.

"როგორც წესი, საკითხი მიიღება კონსენსუსით. ეს იმას არ ნიშნავს, რომ დაავადებათა კონტროლის ცენტრი, ან თქვენი მონა-მორჩილი თუ რამეს იტყვის, ეს აუცილებლად უნდა იქნეს მიღებული, ეს განიხილება და მერე უმრავლესობის აზრი არის. დაავადებათა კონტროლის ცენტრის პოზიცია იყო სხვა, საკოორდინაციო საბჭომ უმრავლესობით მიიღო ეს გადაწყვეტილება გარკვეული პერიოდით, დავაკვირდებით და შემდგომ შეიძლება, გადაიხედოს", - განაცხადა გამყრელიძემ. 

საკოორდინაციო საბჭოს  დღევანდელი გადაწყვეტილებით, მათ ვისაც კორონავირუსი აქვს გადატანილი „მწვანე პასპორტი“ უვადოდ შეუნარჩუნდებათ.

ასევე დაგაინტერესებთ:

🔲 საქართველოში ვაქცინირებული მოქალაქეები სახმელეთო საზღვარზე PCR ტესტის წარდგენისგან გათავისუფლდებიან

🔲 1-ლი დეკემბრიდან რესტორნებს მუშაობაზე საათობრივი შეზღუდვა მოეხსნებათ