დავით ზალკანიანი: “ნატოელი პარტნიორების მხრიდან კიდევ ერთხელ მივიღეთ საქართველოს მიმართ მტკიცე მხარდაჭერის რწმუნება!”

საქართველოს ვიცე-პრემიერმა, საგარეო საქმეთა მინისტრმა, დავით ზალკანიანმა,  ბრიუსელში შეხვედრა გამართა  NATO-ს წევრი ქვეყნების მუდმივ  წარმომადგენლებთან.  შეხვედრის ფარგლებში, ნატოელმა პარტნიორებმა კიდევ ერთხელ  გამოხატეს მხარდაჭერა  საქართველოს მიმართ.

შეხვედრაზე აღინიშნა, უსაფრთხოების საკითხები, საქართველოს როლი რეგიონალურ და გლობალურ უსაფრთხოების დღის წესრიგში. ნატოელმა პარტნიორებმა კიდევ ერთხელ  გამოხატეს  უცვლელი პოზიცია  საქართველოს NATO-ში გაწევრიანების შესახებ.  

„მნიშვნელოვანია, რომ კიდევ ერთხელ გაჟღერდა ნატოელი პარტნიორების პოზიცია, რომ ისინი არიან ერთიანი და მათ მიდგომებში არაფერი იცვლება საქართველოს NATO-ში გაწევრიანებასთან დაკავშირებით, მიუხედავად იმ მწვავე რიტორიკისა, რაც მომდინარეობს რუსეთის ფედერაციისგან და რაც წინააღმდეგობაშია საერთაშორისო პრინციპებთან, შესაბამისად იმ საკითხებთან მიმართებაში, რომელიც იყო წამოწეული ცნობილ ორ დოკუმენტში, ნატოელი პარტნიორების პოზიცია არის მყარი, რომ კერძოდ არ გადაიხედება ბუქარესტის სამიტის გადაწყვეტილება, და რომ არავის აქვს უფლება საკუთარი გავლენის სფეროდ განიხილოს ესა თუ ის რეგიონი და რომ ქვეყნების ფუნდამენტური უფლებაა თავად აირჩიონ თუ უსაფრთხოების რომელ ალიანსში სურთ გაწევრიანება. შესაბამისად, მნიშვნელოვანია ჩვენი კოორდინირებული მოქმედება იმასთან დაკავშირებით, რომ ის პროგრესი რაც აქვს საქართველოს ინტეგრაციის გზაზე არ დაზარალდეს და პირიქით კიდევ უფრო გაძლიერდეს“- აღნიშნა დავით ზალკანიანმა  NATO-ს ელჩებთან გამართული შეხვედრის შემდგომ.