გურამ მაჭარაშვილი: კახა კალაძეს აქვს დიდი პოლიტიკური გამოცდილება, რაც თავისთავად უკვე ნიშნავს, რომ დედაქალაქის მერობას გაცილებით კიდევ უფრო მეტად უკეთ შეძლებს

მერობის პოსტზე რეალური კონკურენტი კახი კალაძეს ვერ ეყოლება, - განაცხადა „ხალხის ძალის“ აღმასრულებელმა მდივანმა გურამ მაჭარაშვილმა.

მისივე თქმით, დიდი მნიშვნელობა არ აქვს, ვის დაასახელებენ ოპოზიციური პარტიები.

„კახი კალაძეს, გარდა იმისა, რომ აქვს პრაქტიკული გამოცდილება მერობის თანამდებობაზე, სოციალურ, ინფრასტრუქტურულ პროექტებზე და ასე შემდეგ, მას აქვს ასევე დიდი პოლიტიკური გამოცდილება, რაც თავისთავად უკვე ნიშნავს, რომ დედაქალაქის მერობას გაცილებით კიდევ უფრო მეტად უკეთ შეძლებს, ვთქვათ, ვიდრე აქამდე აკეთებდა.

რაც შეეხება „ნაცმოძრაობისა“ და მისი ფილიალების წარმომადგენლების კანდიდატურებს, დიდი მნიშვნელობა აქ არ აქვს, ვის დაასახელებენ, რადგან, თავისთავად კონკურენციაში შეხვიდე ისეთ კანდიდატთან, რომელსაც აქვს პრაქტიკული გამოცდილება, პოლიტიკური გამოცდილება, საზოგადოებასთან ურთიერთობა, არის პრაქტიკულად შეუძლებელი. აი, სწორედ ამიტომ არის, როდესაც ვსაუბრობთ იმასთან დაკავშირებით, რომ ამ შემთხვევაში რეალური კონკურენტი კახი კალაძეს ვერ ეყოლება“, - განაცხადა მაჭარაშვილმა.

მმართველი პარტია ქალაქ თბილისის მერობის კანდიდატს დღეს წარადგენს.

კანდიდატი მოქმედი მერი კახა კალაძეა.