კახა კალაძე: ცენტრალური გზები სრულად გაწმენდილია, საზოგადოებრივი ტრანსპორტი ჩვეულებრივად გადაადგილდება

„ცენტრალური გზები სრულად გაწმენდილია, ასევე, მეორე ხარისხოვანი გზები. ტრანსპორტის თვალსაზრისით არსად შეზღუდვა არ გვაქვს, საზოგადოებრივი ტრანსპორტი ჩვეულებრივად გადაადგილდება“, - ამის შესახებ დედაქალაქის მერმა კახა კალაძემ თბილისში მოსულ ნალექთან დაკავშირებით განაცხადა.

მისი თქმით, ავტომობილების შეუფერხებლად გადაადგილების მიზნით გზებზე ტექნიკური მარილი იყრება.

დედაქალაქის მერმა საზოგადოებას მოუწოდა, ზამთრის საბურავების გარეშე გადაადგილებისგან თავი შეიკავონ.

„გაწმენდითი სამუშაოები გუშინ დავიწყეთ. მობილიზებულია მუნიციპალიტეტის ყველა შესაბამისი სამსახური - „თბილსერვისი“, გამგეობები. მინდა ვისარგებლო შემთხვევით და მადლობა გადავუხადო შს სამინისტროს. აქტიური თანამშრომლობა მიდის საპატრულო პოლიციასთან, 112-თან, რადგან თუ სადმე რაიმე აუცილებლობა არსებობს, ცხელი ხაზი ჩართულია და გვაწვდიან შესაბამის ინფორმაციას. გარდა ამისა, მოქმედებს დედაქალაქის მერიის ცხელი ხაზი. ასევე, ინფორმაციას ვიღებთ ჩვენი სატრანსპორტო კომპანიიდან ავტობუსების მძღოლების საშუალებით.

ცენტრალური გზები სრულად გაწმენდილია, ასევე, მეორე ხარისხოვანი გზები. ტრანსპორტის თვალსაზრისით არსად შეზღუდვა არ გვაქვს, საზოგადოებრივი ტრანსპორტი ჩვეულებრივად გადაადგილდება. მოსალოდნელია კიდევ უფრო მეტი ნალექი დღეს ღამეს და ხვალ, მთელი დღის განმავლობაში. რა თქმა უნდა, მზად ვართ, ვმორიგეობთ და ყველაფერს გავაკეთებთ იმისთვის, რომ გზები იყოს გახსნილი. ტექნიკური მარილით დამუშავება მთელი ღამის განმავლობაში გაგრძელდება. მინდა, ასევე, ვთხოვო თანამოქალაქეებს, შემოერთებულ ტერიტორიებზე ზამთრის საბურავების გარეშე თავი შევიკავოთ გადაადგილებისგან. უსაფრთხოება ძალიან მნიშვნელოვანია. სამუშაოები გრძელდება. 100-ზე მეტი ერთეული ტექნიკა გვყავს მობილიზებული“, - აცხადებს კახა კალაძე.