ლევან მაჭავარიანი: ოპოზიცია უბედურ დღეშია, აბსოლუტური ქაოსია და ეტყობა ინსტრუქციებიც იგვიანებს

 ფრაქცია „ქართული ოცნების“ თავმჯდომარის მოადგილე ლევან მაჭავარიანი აცხადებს, რომ ოპოზიცია ძალიან უბედურ დღეშია.

როგორც დეპუტატი აღნიშნავს, ოპოზიციამ  როგორც ამომრჩეველს, ასევე, მათი პარტიის წევრებს იმედები გაუცრუა და აბსოლუტური ქაოსია, ინსტრუქციებიც იგვიანებს.

„ოპოზიცია არის ძალიან უბედურ დღეში. ძალიან ბევრი ინფორმაცია მოდის, მათ შორის პირადად ჩემთანაც ბევრი ადამიანი მოდის, რომლებიც თავიანთ უკმაყოფილებას გამოხატავენ. ადამიანთა ჯგუფი იყო, რომელიც გამსვლელ სიაში იყო, ვიღაცამ ფული დადო ამისთვის, ვიღაცამ ხმები მოიზიდა, ბევრი იშრომა, ვიღაც ბავშვობიდან ოცნებობდა პარლამენტარობაზე და დატოვეს საპარლამენტო მუშაობის მიღმა, ამით თავიანთ ამომრჩევლებსაც იმედები გაუწბილეს. ატყუებდნენ თავიანთი პარტიის წევრებს და საზოგადოების გარკვეულ ნაწილს, თავიანთ მხარდამჭერებს, რომ არჩევნები არის გაყალბებული.

რა თქმა უნდა, თავიანთი ამომრჩეველი ძალიან უკმაყოფილოა იმით, როდესაც პირდაპირ ეთერში ისმენს, როგორ აანონსებენ,  მათ დღის წესრიგს წარმოადგენს დესტრუქცია, ხელოვნური კრიზისის შექმნა, ქვეყნის ეკონომიკური იზოლაცია და ა.შ. შესაბამისად, აბსოლუტურად გამარგინალიზირებულები არიან და ამას ხვდებიან თავიანთი პარტიის წევრები, რა თქმა უნდა. ახლა არის აბსოლუტური ქაოსი, ეტყობა ინსტრუქციებიც იგვიანებს, მაგალითად თვითმმართველობის არჩევნებთან დაკავშირებით. ოპოზიციამ ძალიან კარგად იცის, რომ მათი რეიტინგი დრამატულად არის შემცირებული“, - აღნიშნავს მმართველი გუნდის დეპუტატი.