„მამამთილი შესწრებია და ბავშვი გამოუყვანია...“ - ქმარმა მძინარე ცოლს მრავლობითი ჭრილობები მიაყენა

კაცი, რომელმაც ცოლი სასტიკად მოკლა, ამ დრომდე რეანიმაციულ განყოფილებაშია.

30 წლის გიორგი კავლელაშვილს ოპერაცია უკვე ჩაუტარდა, ის ახლა ბადრაგის მეთვალყურეობის ქვეშ განაგრძობს მკურნალობას.

როგორც ექიმმა "კურიერის" განუცხადა, ამ ეტაპზე დაკავებულის გამოკითხვა ჯანმრთელობის მდგომარეობის გამო მიზანშეწონილი არ არის.

მას ბრალს ოფიციალურად დღეს წაუყენებენ. "კურიერის" ინფორმაციით, აღნიშნული პროცედურა მის გარეშე ჩატარდება. დაკავებულს უკვე ჰყავს ადვოკატი და სწორედ ინტერესების დამცველის თანამონაწილეობით მოხდება ბრალდების წარდგენა.

ამასთან, "კურიერი" დღეს იმ ბინაშიც იმყოფებოდა, სადაც დანაშაული მოხდა. ადგილზე "რუსთავი 2-ის" გადამღებ ჯგუფს დაკავებულის მამა დახვდა, თუმცა მან მომხდართან დაკავშირებით საუბარი არ ისურვა. როგორც ცნობილია, დაკავებულის მამა დანაშაულის მთავარი მოწმეა.

როგორც მეზობლები "კურიერთან" აცხადებენ, მამაკაცი მომხდარს შეესწრო.

"როგორც მეზობლებმა თქვეს, მამამთილი შესწრებია და ბავშვი გამოუყვანია. ალბათ [დაკავებულს] სიმთვრალეში პათოლოგიური გადახრები ჰქონდა, თორემ როგორ შეიძლება ეს ნორმალური ფსიქიკის ადამიანმა გააკეთოს, თუნდაც ნასვამ მდგომარეობაში," - აღნიშნა ერთ-ერთმა მეზობელმა.

კაცმა მძინარე ცოლს დანით სასიკვდილო ჭრილობები გუშინ გამთენიისას მიაყენა.

27 წლის ქალი ინგოროყვას კლინიკაში უმძიმესი დაზიანებებით შეიყვანეს, ის საავადმყოფოში გარდაიცვალა.