მამუკა მდინარაძე „ტვ პირველს“: სად მომძებნეთ და ვერ მიპოვეთ? მთელი დღეა რომ აცხადებთ დაიმალაო, სად მომძებნეთ?

„როგორც კი ვინმე მძლავრად დაუპირისპირდება კორუფციას, იმ წუთს მასზე ახორციელებთ დარტყმებს. თორნიკე რიჟვაძისთვის არავის ხელისუფლებიდან არაფერი დაუბრალებია საერთოდ. ნოდარი მოიშორეთ ყურიდან თუ შეიძლება და ისე გამეცით პასუხი - სად მეძებეთ, „ტვ პირველს“ არ აინტერესებს პასუხი იმიტომ, რომ ნოდარ მელაძე ყურში კარნახობს რაღაცებს და ახლა მებრძვის უკვე ტელეფონის მეშვეობით“, - ასე მიმართა ფრაქცია „ქართული ოცნების“ თავმჯდომარემ მამუკა მდინარაძემ „ტვ პირველის“ ჟურნალისტს.

მამუკა მდინარაძემ „ტვ პირველის“ ჟურნალისტს სთხოვა ხმამაღალ სიგნალზე ჩაერთო საუბარი ნოდარ მელაძესთან, რის შემდეგაც მან საუბარი „ტვ პირველის“ საინფორმაციო სამსახურის უფროსთან გააგრძელა და მას სიცრუის ტირაჟირებისთვის განმარტებები მოსთხოვა.

„ხომ გითხარით ნოდარ მელაძე ჰყავს ყურზეთქო?! სად მომძებნეთ და ვერ მიპოვეთ?! მთელი დღეა რომ აცხადებთ დაიმალაო, სად მომძებნეთ?!“ - მიმართა მდინარაძემ მელაძეს. 

ნოდარ მელაძემ მამუკა მდინარაძეს ოპოზიციის ლიდერის ლევან ხაბეიშვილის განცხადების შესახებ ჰკითხა, რაზეც პარტიის აღმასრულებელმა მდივანმა უპასუხა:

„ლევან ხაბეიშვილი არის თქვენნაირი აგენტი, ძალიან ბევრი წელია გიცნობთ და თქვენ რასაც კადრულობთ, იმას არავინ კადრულობს. თუკი ვინმე ამ ქვეყანაში კორუფციას ებრძვის, ყველას მტერი ხართ თქვენ. თორნიკე რიჟვაძეს რაც შეება - თქვენ დააბრალეთ უკადრებელი“. 

ნოდარ მელაძის კითხვაზე, როდის ჰქონდა თორნიკე რიჟვაძესთან კომუნიკაცია? მდინარაძემ შემდეგნაირად უპასუხა:

„ბევრჯერ მქონდა თორნიკე რიჟვაძესთნ კომუნიკაცია. არა იმაზე, რაზეც შენ ლაპარაკობ ნოდარ. მქონდა კომუნიკაცია სხვადასხვა საკითხებზე, მათ შორის, მის დიპლომატიურ სამსახურში გადასვლასთან დაკავშირებით, ჩემს აზრთან დაკავშირებით“.