"მომხმარებლის რაღაც რაოდენობას აქვს შეგრძნება, რომ ტარიფი გაიზარდა" - "თელმიკოს" წარმომადგენლის განმარტება დენის ტარიფის ზრდაზე

კომპანია „თელმიკოს“ კლიენტთა მომსახურების სამსახურის ხელმძღვანელმა, თეა ნოზაძემ ტელეკომპანია „იმედის“ ეთერში განაცხადა, რომ მოსახლეობას დენის ტარიფის ზრდის განცდა აქვს.

„მოსახლეობის ძირითადი უკმაყოფილება ეხება იმას, რომ გაიზარდა დავალიანება, ანუ მოხმარებული ელექტროენერგიის მოცულობას აპროტესტებენ.

დავალიანება გამომდინარეობს იქიდან, თუ რა ჩვენებაც არის მრიცხველზე.

მრიცხველის ჩვენების დაფიქსირებას ახდენს კომპანია „თელასი“, რომელიც გვაწვდის ჩვენ ამ ინფორმაციას, მოხმარებულ კილოვატებზე და ჩვენ სემეკის დადგენილების შესაბამისად განვსაზღვრავთ უკვე შესაბამის ტარიფს, ვაფორმირებთ ლარს, ქვითარს და ვაწვდით მომხმარებელს.

ძირითადად, ეს უკმაყოფილება უსაფუძვლო აღმოჩნდება ხოლმე და აქედან გამომდინარე, მომხმარებელს ვთხოვთ, სანამ მოგვმართავს, თუ იცის, სად მდებარეობს მისი მრიცხველი, შეუძლია, თვითონვე გადაამოწმოს მრიცხველის ჩვენების შესაბამისად  ფიქსირდება თუ არა ის ჩვენება.

არის ერთი შემთხვევა, როდესაც ჰგონიათ, რომ ტარიფი გაიზარდა, რეალურად გვიკავშირდებიან და ვუხსნით, რომ დეკემბერში თანხა არ გაქვთ გადახდილი და ამან გამოიწვია, თორემ თვიური მოხმარება არ გაზრდილა.

და არის კიდევ მეორე მომენტიც, როდესაც მომხმარებლის რაღაც რაოდენობას აქვს ამის შეგრძნება“, – ამბობს თეა ნოზაძე.

მისი თქმით, არ გამორიცხავენ, რომ შეიძლება, ჩვენება არასწორად იყოს დაფიქსირებული.

„600 000-ზე მეტი მომხმარებელი გვყავს და შესაძლებელია, ჩვენება არასწორად იყოს დაფიქსირებული.

ჩვენ ვალდებულნი ვართ, ამ ჩვენების საფუძველზე, რომელსაც „თელასი“ გვაწვდის, განვახორციელოთ დარიცხვა. ყველას შეუძლია, მოგვმართოს ნებისმიერ საკითხზე“, – აღნიშნავს თეა ნოზაძე.

თეა ნოზაძის განმარტებით, ორი ქვითარი მხოლოდ დეკემბერში იყო. ამის შემდეგ ჩვენება ყოველი თვის ბოლო 4 დღეში წაიკითხება.

სხვა სიახლეები:

🔳 "ერთთვიანი სამგზავრო აბონემენტის ღირებულება არა 150, არამედ 40 ლარია" - კალაძე ერთ-ერთ მედიასაშუალებას დეზინფორმაციის გავრცელებაში ადანაშაულებს

🔳 საგარეო საქმეთა სამინისტრომ დიასპორის წარმომადგენლებისთვის სამი საგრანტო კონკურსი გამოაცხადა