„ნავთლუღის სპეცოპერაციისას“ მოკლული მარად ართმელაძის მამა: ბიჭები უკვე გაციებული არიან, დაიდგა სცენარი, რომ ვითომ ავტომატები გააჩნდათ და ორმხრივი სროლის შედეგად, დაიღუპა სამი ახალგაზრდა

 საქართველოს პარლამენტის დროებითი საგამოძიებო კომისიის სხდომაზე, „ნავთლუღის სპეცოპერაციისას“ მოკლული მარად ართმელაძის მამამ მიხეილ ართმელაძემ ისაუბრა.

როგორც მიხეილ ართმელაძე აღნიშნავს, დათა ახალაიას მეთაურობით, მარად ართმელაძე, რომან სურმანიძე და მურად გორგაძე უმოწყალოდ, ყოველგვარი გაფრთხილების გარეშე დახოცეს, შემდეგ კი, გურამ დონაძის მეშვეობით დაიდგა სცენარი, რომ ვითომ მათ ჰქონდათ ავტომატები და ორმხრივი სროლის შედეგად, დაიღუპა სამი ახალგაზრდა.

„ყოველგვარი გაფრთხილების გარეშე რომ დახოცა ბიჭები, ფიქრობს რა გავაკეთო და დაურეკეს გურამ დონაძეს. დადგეს ყალბი სცენარი. ეს ბიჭები უკვე გაციებული არიან. იღებს დონაძე, გარბიან დათა ახალაია, გიორგი დგებუაძე, ლევან ქარდავა და გიორგი მაზმიშვილი. გარბიან აღმა სროლით, ძირს ავტომატებიო. ესე იგი ბრალდებას უყენებენ, ვითომ ამ ბიჭებს ავტომატები გააჩნდათ. ამ დროს, ერთ-ერთმა გამოძიებით დაუდგენელმა პიროვნებამ შავი ჯიპიდან ამოიღო ჩანთა, რომელშიც ეწყო ავტომატები და მიიტანა და თითოეულს გვერდზე დაუწყო. დაიდგა სცენარი, რომ ვითომ ავტომატები გააჩნდათ და ორმხრივი სროლის შედეგად, დაიღუპა სამი ახალგაზრდა. ვითომ ჩვენ ბიჭებსაც ავტომატები ქონდათ და იძულებული გახდნენ ძალოვნები, რომ ესროლათ და დაეხოცათ ეს ბიჭები“, - განაცხადა მიხეილ ართმელაძემ.