პრემიერი: პირველი მარტიდან სოციალური შემწეობის მიმღებ შრომისუნარიანი პირებისთვის საზოგადოებრივ სამუშაოებზე დასაქმების მასშტაბური პროგრამა დაიწყება

"პირველი მარტიდან დაიწყება სოციალური შემწეობის მიმღებ შრომისუნარიან პირებზე ორიენტირებული დასაქმების აქტიური პოლიტიკა, საზოგადოებრივ სამუშაოებზე დასაქმების მასშტაბური პროგრამა", – ამის შესახებ საქართველოს პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა.

მისი თქმით, საზოგადოებრივი სამუშაო არ განაპირობებს სოციალური დახმარების შეწყვეტას.

ღარიბაშვილის განცხადებით, მოსარგებლის ოჯახს ოთხი წლის განმავლობაში შეუნარჩუნდება საარსებო შემწეობა.

„მოგეხსენებათ, რამდენიმე კვირის წინ ღიად ვისაუბრე ამ საკითხზე, ეს არის ინიციატივა, რომელიც შეეხება საზოგადოებრივი სამუშაო ადგილების შექმნას საქართველოში და სოციალურად დაუცველი მოქალაქეების, შრომისუნარიანი მოქალაქეების დასაქმებას. ამ მიზნით, ჯერ კიდევ ნოემბერში ჩვენ დავიწყეთ მუშაობა, მე ლევან დავითაშვილის ხელმძღვანელობით გუნდი გავაგზავნე ევროპის რამდენიმე ქვეყნის მაგალითის შესასწავლად.

ჩვენ კარგად შევისწავლეთ, როგორ მუშაობს, როგორ მუშაობდა ევროპაში აღნიშნული ინიციატივა და დღეს გვაქვს მზაობა, რომ დავიწყოთ ეს პროგრამა. მოსახლეობას მინდა, განვუმარტო, რას გულისხმობს ეს ინიციატივა. მოგეხსენებათ, ჩვენი მთავარი ამოცანა არის სიღარიბის დაძლევა და სამუშაო ადგილების შექმნა, ზოგადად უნდა შევცვალოთ სოციალური პოლიტიკა და კარგად ვიცით, რომ გზა სიღარიბის შემცირებისკენ ახალი სამუშაო ადგილების შექმნაზე გადის.ამიტომ, წელს უნდა დავიწყოთ აქტიური დასაქმების პოლიტიკა. ეს იქნება ჩვენი მთავარი საზრუნავი. შევახსენებ საზოგადოებას, რომ დღემდე არსებული სოციალური პოლიტიკა შრომისუნარიან, სოციალურად დაუცველ მოქალაქეებს, უნდა ითქვას, რომ უმოქმედობისკენ უბიძგებს. 600 ათასი სოციალურად დაუცველი მოქალაქიდან 200 ათასი შრომისუნარიანი მოქალაქე არ არის ჩართული ჩვენი ქვეყნის მშენებლობაში. არ მონაწილეობენ და არიან დემოტივირებული, დასაქმდნენ ლეგალურად. ამიტომ, ჩვენ რა თქმა უნდა, უნდა დავეხმაროთ სოციალურად დაუცველ მოხუცებს, ბავშვებს, შშმ პირებს, ყველას, ვისაც ეს სჭირდება, მაგრამ შრომისუნარიან ადამიანებს სჭირდებათ არა შემწეობა, არამედ დასაქმება, ამოქმედება, საკუთარი თავის რეალიზება. თითოეული ოჯახის კეთილდღეობისთვის, ქვეყნის განვითარებისთვის, აუცილებელია, რომ შრომისუნარიანი მოქალაქეები ჩაერთოს ეკონომიკურ პროცესში.

ამ მიზნით, ჩვენ ამ პროცესს დავიწყებთ პირველი მარტიდან და ვიწყებთ სოციალური შემწეობის მიმღებ შრომისუნარიან პირებზე ორიენტირებულ დასაქმების აქტიურ პოლიტიკას, საზოგადოებრივ სამუშაოებზე დასაქმების მასშტაბურ პროგრამას. საზოგადოებრივი სამუშაოები სპეციალურად სამიზნე ჯგუფებისთვის შეიქმნება და ისეთ სამუშაოებს გულისხმობს, რომლის შესრულებაც ნებისმიერი კვალიფიკაციის პირს შეუძლია. ეს ხელს შეუწყობს მათი მოტივაციის ამაღლებას, წაახალისებს მათი შრომის ბაზარზე გასააქტიურებლად და პროგრამა, როგორც აღვნიშნე, საუკეთესო დასავლური პრაქტიკის შესწავლის შედეგად შევიმუშავეთ. აქ მივიღებთ ორმაგ შედეგს. ერთი მხრივ, გაიზრდება სოციალური შემწეობის მიმღებ უმუშევართა შემოსავლები და ამავდროულად, ახალი ინფრასტრუქტურის შექმნის ან არსებულის გასაუმჯობესებლად შექმნის მნიშვნელოვან საზოგადოებრივ სიკეთეს. პროგრამით ისარგებლებენ 18 წლიდან საპენსიო ასაკამდე სოციალური შემწეობის მიმღები შრომისუნარიანი პირები, რომელთაც არ აქვთ მინიჭებული შშმ სტატუსი ან არ აქვთ ჯანმრთელობის მძიმე პრობლემები. ჩვენი პროგნოზით, სულ დასაქმდება 200 ათასზე მეტი ადამიანი. მინდა აღვნიშნო ხაზგასმით, რომ საზოგადოებრივი სამუშაო არ განაპირობებს სოციალური დახმარების შეწყვეტას. მოსარგებლის ოჯახს ოთხი წლის განმავლობაში შეუნარჩუნდება საარსებო შემწეობა. ის დახმარება, რასაც იღებს, მიიღებს ოთხი წლის განმავლობაში, ჩვენ ამას არ შევეხებით. პროგრამაში ჩართულ თითოეულ მოქალაქეს მიეცემა დამატებით 300 ლარი“, – განაცხადა ირაკლი ღარიბაშვილმა.

სხვა სიახლეები:

🔳 საქართველოში კორონავირუსით კიდევ 21 პაციენტი გარდაიცვალა - ეპიდვითარება ქვეყანაში

🔳 საქართველოში კიდევ ერთი მიწისძვრა მოხდა

🔳 "საფლავსაც ვერ ნახავს შენსას ვერავინ, სიტყვას გაძლევ" - ვინ დაემუქრა თეა წულუკიანს? (ფოტო)