სად დაგჭირდებათ 1 დეკემბრიდან „მწვანე პასპორტი“ - მთავრობა მოქალაქეებს აფრთხილებს

კვების ობიექტები, რესტორნები, კაფე - ბარები,  ღია და დახურული სივრცეები, კინოთეატრები, თეატრები, ოპერა, საკონცერტო დარბაზები, გასართობი ცენტრები, სამორინეები და სათამაშო ბიზნესს ობიექტები, სპა-ცენტრები, ფიტნეს-დარბაზები, სასტუმროები და სამთო კურორტები, მათ შორის საბაგირო, - ყველა ჩამოთვლილ ობიექტზე, 2021 წლის 1 დეკემბრიდან მხოლოდ „მწვანე პასპორტით“ შეხვალთ.

დღეს მოქალაქეებმა მთავრობისგან მოკლეტექსტური შეტყობინება მიიღეს, სადაც განმარტებულია, რომ  კოვიდპასპორტის წარდგენა, საზოგადოებრივ ტრანსპორტში და მაღაზიებში სავალდებულო არ იქნება.

შეტყობინებაში ასევე აღნიშნულია, რომ ​კოვიდპასპორტის გამოყენება, მხოლოდ 18 წელს ზემოთ მყოფი პირებისთვის იქნება სავალდებულო. 

საკოორდინაციო საბჭოს 24 ნოემბერს მიღებული გადაწყვეტილებით, მათ ვისაც კორონავირუსი აქვს გადატანილი „მწვანე პასპორტი“ უვადოდ შეუნარჩუნდებათ.

რასაც არ ეთანხმებიან სპეციალისტები, მათ შორის დაავადებათა კონტროლის ეროვნული ცენტრის ხელმძღვანელის მოადგილე პაატა იმნაძე.

ის ამბობს, რომ „უკვე გამოქვეყნებულია კვლევები... გარდა ამისა კორონავირუსით რეინფიცირების 5 000-ზე მეტი შემთხვევა ჩვენც გვაქვს ქვეყანაში. კოვიდის გადატანა იმის გარანტიას არ იძლევა, რომ ვირუსი აღარ დაგემართება“.

მთავრობის გადაწყვეტილებას არ ეთანხმება იმუნიზაციის ტექნიკურ მრჩეველთა ეროვნული ჯგუფის ხელმძღვანელი ივანე ჩხაიძეც.

"კორონავირუსი არ არის წითელა, რომ გადაიტანო და მთელი ცხოვრება თავისუფალი იყო", - ამბობს ის.

„საქართველოსნაირი ქვეყანა მსოფლიოში მეორე არ არის, განსაკუთრებულები ვართ უვადო მწვანე პასპორტითაც“ -  თქვა საქართველოს ჯანდაცვის მინისტრმა ეკატერინე ტიკარაძე.

ამავე თემაზე:

🔵 პაატა იმნაძე "უვადო მწვანე სტატუსის" მინიჭებას არ ეთანხმება

🔵 საქართველოსნაირი ქვეყანა მსოფლიოში მეორე არ არის, განსაკუთრებულები ვართ უვადო მწვანე პასპორტითაც – ეკატერინე ტიკარაძე