პაატა იმნაძე "უვადო მწვანე სტატუსის" მინიჭებას არ ეთანხმება

„ჩემი აზრით შესაცვლელია“– დაავადებათა კონტროლის ეროვნული ცენტრის ხელმძღვანელის მოადგილე პაატა იმნაძე საკოორდინაციო საბჭოს მიერ გუშინ მიღებულ გადაწყვეტილებას  არ ეთანხმება, რომელიც კოვიდ-გადატანილებისთვის "უვადო მწვანე სტატუსის" მინიჭებას ითვალისწინებს.

NCDC-ის ხელმძღვანელის მოადგილე ამბობს, რომ კოვიდის ერთხელ გადატანა რეინფიცირებისგან არ გიცავს.

„უკვე გამოქვეყნებულია კვლევები... გარდა ამისა კორონავირუსით რეინფიცირების 5 000-ზე მეტი შემთხვევა ჩვენც გვაქვს ქვეყანაში. კოვიდის გადატანა იმის გარანტიას არ იძლევა, რომ ვირუსი აღარ დაგემართება“, - თქვა პაატა იმნაძემ.

კითხვაზე - მაშინ რატომ მიიღეს უვადო მწვანე სტატუსი იმ ადამიანებმა, ვინც ერთხელ გადაიტანა კოვიდი, მან უპასუხა: „კიდევ დაგროვდება სამეცნიერო მტკიცებულებები და იმედი მაქვს ეს შეიცვლება. ჩემი აზრით შესაცვლელია“.

„საქართველოში შესაძლებელია მწვანე პასპორტის ორი ვარიანტი იყოს დაშვებული - შიდა მოხმარების და საზღვარგარეთ მგზავრობისთვის“, - ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ დღეს, 25 ნოემბერს განაცხადა.

ასევე დღეს განაცხადა საქართველოს ჯანდაცვის მინისტრმა ეკატერინე ტიკარაძემ, რომ „საქართველოსნაირი ქვეყანა მსოფლიოში მეორე არ არის, განსაკუთრებულები ვართ უვადო მწვანე პასპორტითაც“.

საკოორდინაციო საბჭოს 24 ნოემბერს მიღებული გადაწყვეტილებით, მათ ვისაც კორონავირუსი აქვს გადატანილი „მწვანე პასპორტი“ უვადოდ შეუნარჩუნდებათ.

ამავე თემაზე:

🔵 "კორონავირუსი არ არის წითელა, რომ გადაიტანო და მთელი ცხოვრება თავისუფალი იყო" - ივანე ჩხაიძე უვადო "მწვანე სტატუსზე"

🔵 ბიძინა კულუმბეგოვი: აცრილი და ინფორმირებული სამედიცინო პერსონალი გადამწყვეტია იმუნიზაციის პროცესის წარმატებაში!