შალვა პაპუაშვილი: ონლაინ მედიის წარმომადგენლები არიან უცხოეთიდან დაქირავებული „ენჯეოები“, რომლებიც მიკროფონით დადიან, ეს არის ერთადერთი განსხვავება მათსა და სხვა „ენჯეოებს“ შორის

„ევროკომისარმა მარტა კოსმა დაადასტურა და აღიარა, რომ ისინი ეძებენ გზებს, თუ როგორ აუარონ გვერდი ქართულ კანონმდებლობას და მიაწოდონ ფინანსები მათ მიერ დაქირავებულ ორგანიზაციებს“, - განაცხადა გადაცემაში „იმედის კვირა“ საქართველოს პარლამენტის თავმჯდომარემ შალვა პაპუაშვილმა უცხოურ დაფინანსებაზე საუბრისას.

მისივე თქმით, როგორც ჩანს ეს გზები მოძებნილი აქვთ.

„არის გარკვეული ინფორმაციები, როცა ხდება სხვა ქვეყანაში ფიქტიური ორგანიზაციების დაფუძნება. ესტონეთი არის გამორჩეული, როცა ფიქტიური ქართული ორგანიზაციები რეგისტრირდება ესტონეთის რეესტრში და შემდეგ იმ ფიქტიური ორგანიზაციების გამოყენებით ხდება ფინანსური რესურსების მიწოდება სხვადასხვა უცხოეთიდან დაქირავებული ორგანიზაციისთვის თუ პირისთვის. როგორც შავი ფული ისე შემოდის და ტრიალებს საქართველოში. ამ ყველაფერში ჩართულია სხვადასხვა ევროპული ფონდი.

რაც შეეხება ე.წ. ონლაინ მედიას, დიდი ალბათობით ისინი არიან ევროკავშირის ბიუჯეტით დაფინანსებული პროპაგანდისტები, რომლებსაც მედიასთან დიდი ხანია კავშირი გაწყვეტილი აქვთ, არიან უცხოეთიდან დაქირავებული „ენჯეოები“, რომლებიც მიკროფონით დადიან. ეს არის ერთადერთი განსხვავება მათსა და სხვა „ენჯეოებს“ შორის“, - აღნიშნა შალვა პაპუაშვილმა.