თეა ახვლედიანმა აზერბაიჯანელ თანამოქალაქეებს ნოვრუზ ბაირამის დღესასწაული მიულოცა

სახელმწიფო მინისტრი თეა ახვლედიანი, საქართველოს პრემიერ-მინისტრ ირაკლი კობახიძესთან, პრეზიდენტ მიხეილ ყაველაშვილთან და პარლამენტის თავმჯდომარე შალვა პაპუაშვილთან ერთად, ქვემო ქართლის რეგიონში იმყოფებოდა.

თეა ახვლედიანმა ქალაქის ცენტრალურ მოედანზე შეკრებილ მოსახლეობას სიტყვით მიმართა და აზერბაიჯანელ თანამოქალაქეებს ნოვრუზ ბაირამის დღესასწაული მიულოცა.

„მე ძალიან მოხარული ვარ დღეს რომ საქართველოს ხელისუფლების უმაღლეს წარმომადგენლებთან, სახალხო დამცველთან და ჩემს კოლეგებთან ერთად, მაქვს შესაძლებლობა და პატივი მოგმართოთ, და მოგილოცოთ ყველას, ჩვენს თითოეულ მოქალაქეს, ვინც დღეს ზეიმობთ ნოვრუზ ბაირამს.

დღეს ჩვენ მარნეულში ერთად აღვნიშნავთ ამ უძველესი კულტურისა და ტრადიციის დღესასწაულს, რაც წარმოაჩენს იმ ურთიერთპატივისცემას და იმ უნიკალურ ღირებულებებს, რაც ჩვენს ქვეყანაში მრავალეთნიკური საზოგადოების წევრებს შორის საუკუნეების მანძილზე ჩამოყალიბდა; ეს ჩვენი ისტორიული მონაპოვარია, რომელსაც დღეს ჩვენ განვამტკიცებთ ერთმანეთის თანადგომით, კულტურული თვითმყოფადობის მხარდაჭერით, სამოქალაქო თანასწორობისა და ინტეგრაციის პოლიტიკის ფარგლებში, მათ შორის და იმ ძალისხმევით, რომლითაც ჩვენ მომავალშიც ერთად მივაღწევთ ჩვენი ქვეყნისა და ხალხის საკეთილდღეოდ დასახულ მიზნებს. კიდევ ერთხელ გილოცავთ“, - განაცხადა სახელმწიფო მინისტრმა, თეა ახვლედიანმა.

სახელმწიფო მინისტრი ნოვრუზ ბაირამისადმი მიძღვნილ საზეიმო ღონისძიებებს დაესწრო და ადგილზე მოწყობილი ეთნო კუთხეები და ხელნაკეთი ნივთების საგამოფენო სივრცეები დაათვალიერა.

მარნეულში გამართულ საზეიმო ღონისძიებებს ასევე ესწრებოდნენ მინისტრთა კაბინეტის წევრები, საქართველოს პარლამენტის დეპუტატები, სახალხო დამცველი ლევან იოსელიანი, ქვემო ქართლში სახელმწიფო რწმუნებული გიორგი დოხტურიშვილი, მარნეულის მერი ქენან ომაროვი და ადგილობრივი ხელისუფლების სხვა წარმომადგენლები.