თურქეთში 343 ადამიანი დააკავეს

 თურქეთში კვლავ გრძელდება საპროტესტო აქციები, მას შემდეგ, რაც სტამბოლის მერი და ოპოზიციის ერთ-ერთი ლიდერი ეკრემ იმამოღლუ დააკავეს. აქციების მესამე დღეს პოლიციამ 343 ადამიანი დააკავა. ინფორმაციას Deutche Welleავრცელებს.

დემონსტრანტები თურქეთის მსხვილ ქალაქებში იმის მიუხედავად იკრიბებიან, რომ შს მინისტრმა ალი ერლიკაიმ აქციების ჩატარება აკრძალა. თურქეთის პრეზიდენტმა რეჯეფ თაიფ ერდოღანმა პროტესტებს „ქუჩის ტერორი“ და ქაოსი“ უწოდა.

„343 ეჭვმიტანილი დაკავებულია სტამბოლში, ანკარაში, იზმირში, ადანაში, ანტალიაში და რამდენიმე სხვა ქალაქში“, - დაწერა X-ში თურქეთის შს მინისტრმა.

სტამბოლში შეკრებილმა აქციის მონაწილეებმა არა მარტო იმამოღლუს გათავისუფლება, არამედ მთავრობის გადადგომაც მოითხოვეს. პოლიციამ აქციის მონაწილეთა წინააღმდეგ ცრემლსადენი გაზი გამოიყენა.

ბლოგერები წერენ, რომ Х-ში თურქი აქტივისტების ექაუნთები იბლოკება, რომლებიც პროტესტების შესახებ ინფორმაციას ავრცელებენ.

ეკრემ იმამოღლუ 19 მარტს დააკავეს. ის დანაშაულებრივი დაჯგუფების შექმნასა და კორუფციაშია ბრალდებული. თურქეთის სახელმწიფო მედიის ცნობით, იმამოღლუს წინააღმდეგ გამოძიება ტერორიზმის მუხლითაც მიმდინარეობს, კერძოდ, ის „ქურთთა მუშათა პარტიის“ მხარდაჭერაშია ბრალდებული.

დაკავებები და პროტესტები თურქეთში საპრეზიდენტო არჩევნების კანდიდატად იმამოღლუს დასახელებამდე რამდენიმე დღით ადრე მოხდა. არჩევნები თურქეთში 2028 წელს ტარდება. იმამოღლუს სასამართლო 22 მარტს იმართება.