უკრაინელი მოსწავლეები სკოლაში საქართველოს განათლების მინისტრმა მიაცილა

საქართველოს რამდენიმე საჯარო სკოლაში, უკრაინაში მიმდინარე საომარი მოქმედებების შედეგად დაზარალებული რამდენიმე მოსწავლე უკვე ჩაირიცხა. ისინი საკლასო ოთახებამდე განათლების მინისტრმა მიაცილა და ახალი მეგობრები გააცნო. 

ინფორმაციას განათლებისა და მეცნიერების სამინისტრო ავრცელებს.

მათივე ცნობით, მიხეილ ჩხენკელმა სკოლის დირექტორთან ერთად მოსწავლეთა მშობლებთან შეხვედრა გამართა, ბავშვების საჭიროებებს პირადად გაეცნო და სკოლის ადმინისტრაციასთან ერთად მათთვის შესაბამისი საგანმანათლებლო გარემოს უზრუნველყოფის დეტალები განიხილა.

ამ დროისათვის არსებული მონაცემებით, თბილისსა და რეგიონებში, სკოლებში ჩარიცხვის სურვილი სხვადასხვა ასაკის 110 მოსწავლის მშობელმა გამოთქვა, მათგან 58 უკვე ჩარიცხულია, 52 კი უმოკლეს ვადაში ჩაირიცხება.

სამინისტროს ინფორმაციით, უკრაინიდან ჩამოსულ ბავშვებს მანდატურის სამსახურის ფსიქოლოგები ფსიქოსოციალურ მხარდაჭერას უწევენ. მნიშვნელოვანია, რომ აღნიშნული ინფორმაციის გავრცელებისთანავე, მანდატურის სამსახურის ფსიქოსოციალური მომსახურების ცენტრს ათობით დაინტერესებულმა პირმა მიმართა.

საქართველოს მთავრობის მიერ მიღებული გადაწყვეტილებით, სკოლის მოსწავლეები, რომლებიც უკრაინაში დაწყებული საომარი მოქმედებების შედეგად ვერ აგრძელებენ ზოგადი განათლების მიღებას უკრაინის სკოლებში და გამოხატავენ სურვილს, სწავლა გააგრძელონ საქართველოში, სკოლებში გამარტივებული წესით ჩაირიცხებიან. საქართველოში სწავლის გაგრძელების მსურველებმა განცხადებით უნდა მიმართონ სასურველ სკოლას.

ასევე საინტერესოა:

🔵 უკრაინამ ქალაქ მაკარივზე კონტროლი დაიბრუნა

🔵 რუსმა ოკუპანტებმა მარიუპოლიდან მიმავალ 20-ზე მეტ საევაკუაციო ავტობუსს ცეცხლი გაუხსნეს

🔵 რუსმა ოკუპანტებმა რამდენიმე უკრაინელი ჟურნალისტი დააკავეს