ზვიად შალამბერიძე: 26 მაისი არის ქვეყნის და ყველა ქართველისა ზეიმი, ამიტომ ეს დღე ყველამ ერთად უნდა ვიზეიმოთ - ვისაც რადიკალიზაცია უნდა, წავიდნენ ჩვენი ქვეყნიდან და სხვაგან მოიყარონ თავი

ზვიად შალამბერიძე 26 მაისს ოპოზიციის ძალადობრივ გეგმებს „დღის ქრონიკაში“ გამოეხმაურა. რეგიონული პოლიტიკისა და თვითმმართველობის საპარლამენტო კომიტეტის თავმჯდომარის პირველმა მოადგილემ აღნიშნა, რომ 26 მაისი არის ქვეყნისა და ყველა ქართველისა ზეიმი, ამიტომ ეს დღე ყველამ ერთად უნდა იზეიმოს.

„26 მაისი არის ყველა ქართველისა და ქვეყნის ზეიმი, ამიტომ ეს დღე ყველამ ერთად უნდა ვიზეიმოთ. ოპოზიციამ რომ ისეთი რადიკალური ნაბიჯები გადადგას, რომელიც 26 მაისის აღნიშვნას ხელს შეუშლის, დარწმუნებული ვარ, რომ მათ ამის უნარი და რესურსი არ აქვთ. ყოველთვის ცდილობენ, რომ მაშველი რგოლი მოიშველიონ იმ უცხოელი ევროპარლამენტარების სახით, რომლებიც ჩამოდიან და ვითომ რაღაცას აკეთებენ ისეთს და აჩვენებენ ჩვენ მოქალაქეებს, რომ გარკვეული ევროპარლამენტარები თითქოს მათ გადაწყვეტილებებს გვერდში უდგას. მაგრამ ესეც არ არის ჩვენთვის ის ნიშა, რომ ამისთვის 26 მაისი და სახალხო ზეიმი ან შევზღუდოთ ან გავაუქმოთ. ისე როგორც თბილისში, საქართველოს ყველა მუნიციპალიტეტში და მათ შორის იმერეთშიც ძალიან მასშტაბური ღონისძიებები გვექნება. ვისაც 26 მაისის აღნიშვნა არ უნდა და რადიკალიზაცია უნდა, წავიდნენ ჩვენი ქვეყნიდან და სხვაგან მოიყარონ თავი“, - აღნიშნა ზვიად შალამბერიძემ.

„ჩვენი საქართველო-სოლიდარობის ალიანსის“ აღმასრულებელმა მდივანმა გედევან ფოფხაძემ განაცხადა, რომ რადიკალიზაციის მომხრეა და უნდა მოხდეს შენობების პიკეტირება. ფოფხაძემ ასევე ისაუბრა 26 მაისის რადიკალიზაციის დროს შესაძლო მსხვერპლზე.